Novo xogo descargable das Tartarugas Mutantes

As Tartarugas Mutantes non queren deixar de repartir estopa nas rúas de New York, e dende hoxe poden volver facelo no seu xogo descargable Teenage Mutant Ninja Turtles: Out of the Shadows, no que poderemos encarnar a Leonardo, Donatello, Raphael e Michelangelo nas súas batallas contra os mutantes, o Clan do Pé e o Desfibrador nun beat’em up bastante clásico que ten a súa forza en modos multixogador de ata 4 usuarios simultáneos.
Este novo título é un dos destacados para Xbox 360 dentro do Summer of Arcade, vendéndose para a consola de Microsoft por un prezo de 14,39 euros, aínda que tamén está dispoñible para PC por 14,99 euros (en breve tamén chegará á PS3).
Teenage Mutant Ninja Turtles: Out of the Shadows conta con modo campaña, arcade, desafío e adestramento en dojo; permite xogar ata 2 usuarios en local e ata 4 en liña, ten numerosos ataques combinados e será o primeiro dunha triloxía.
Estamos ante un xogo das Tartarugas Mutantes cun toque algo adulto, mentres que para os afeccionados á última serie de animación emitida en España por Clan e Nickleodeon sería máis recomendable agardar ao mes de outubro para facerse con outro xogo dos sapoconchos máis marciais, que desta volta si tomará unha aparencia máis infantil.