Nova edición do Premio ao Mellor Proxecto Universitario con Licenza Libre
luns, 23 de xullo do 2018
A
Axencia para a Modernización Tecnolóxica de Galicia (AMTEGA) vén
de convocar a nova edición, a número once, do seu recoñecemento
específico para iniciativas baseadas en tecnoloxías libres feitas
polas nosas e os nosos estudantes. Estamos
a falar do Premio ao Mellor Proxecto Universitario con Licenza Libre,
que ten aberto o prazo de presentación de candidaturas até o 2 de
outubro e está dotado con 2.250 euros. En palabras de AMTEGA,
ten “o obxectivo de achegar aos universitarios galegos ao software
libre e ás posibilidades de emprego que lles pode abrir a
publicación ou colaboración ao abeiro deste tipo de ferramentas”.
Como
dixemos, o premio está dotado con 2.250 euros, repartidos nun
primeiro galardón de 1.500€ e nun segundo de 750 euros, grazas á
achega do Consorcio para o desenvolvemento de aplicacións para a
Xestión Universitaria (CIXUG), e do Grupo de programadores e
usuarios de Linux (GPUL), respectivamente. Ambas entidades son
patrocinadoras do premio no marco do convenios de colaboración
asinados coa AMTEGA para a realización de actividades de promoción
do Software Libre en Galicia.
Pode
optar ao premio calquera estudante do Sistema Universitario Galego
que teña defendido o seu proxecto de fin de carreira, traballo de
fin de grao ou traballo de fin de mestrado cunha nota mínima de 5,
nalgunha das convocatorias do ano académico 2017-2018.
Os
requisitos que deben cumprir estes traballos son: ter sido realizados
cunha implementación libre de calquera linguaxe de programación e
ter publicado o software desenvolvido durante o proxecto cunha
licenza libre entre as recoñecidas como tal pola Free Software
Foundation ou a Open Source Initiative. Así mesmo, tamén poden
participar proxectos que fagan uso de hardware libre.
Toda
a información sobre como participar está dispoñíbel na páxina do
premio dentro do portal Mancomún. www.mancomun.gal/premiopfc.
Ademais, para calquera consulta pode contactarse coa organización do
premio, tanto a través da Oficina de Coordinación de Software Libre
da AMTEGA como da Oficina de Software Libre do CIXUG.