NeThinking recuperará o debate sobre redes sociais na Illa de San Simón

Moitos dos participantes da edición de 2011 repetirán este ano na Illa do Pensamento

A boa acollida do encontro NeThinking o ano pasado levou a que os vindeiros días 7 e 8 de marzo San Simón reeditará o encontro de comunicadores e expertos en redes sociais para debater e reflexionar sobre distintas temáticas ao redor dos xeitos de comunicar na era da Internet, analizando o presente e tratando de intuír o futuro desta revolución permanente.
A segunda edición deste foro recuperará o seu arriscado formato, consistente na ausencia de público presencial, xa que os debates poderán seguirse en remoto a través de streaming e por Twitter, para o que etiquetarán os comentarios baixo o hashtag #NeThinking, o que permitirá a interacción entre os participantes presenciais e o público na Rede.
A organización de NeThinking vén de anunciar a relación de participantes no evento, que serán o consultor Mario Tascón; Javier Celaya; Ismael El-Qudsi, organizador do evento Internet es Tuyo; Juanjo Amorín, director xeral de Kedin; Marilín Gonzalo, directora de contidos de Hipertextual; Eduardo Arcos, fundador de Hipertextual; José Jiménez Moltó, autor do blog Kurioso.es; Javier Pedreira Wicho, co autor do blog Microsiervos; Nacho Vigalondo, director de cine; Antón Losada, profesor de Ciencias Políticas e colaborador de distintos medios de comunicación; Antonio Delgado, autor do blog Caspa.tv; Valentín Alejandro Martínez, xornalista e profesor da UDC; Julián Hernández, líder do grupo Siniestro Total; Nacho de la Fuente, community manager da Corporación Voz de Galicia; Carmela Ríos, autora do blog Jugaba en el Betis; o profesor e blogueiro Manuel Gago; Francisco Campos Freire, xornalista e profesor da USC; Xosé López, profesor da USC; Elena Gómez del Pozuelo, presidenta de Adigital; e, de xeito virtual, a blogueira cubana Yoani Sánchez.