Meubook edita un libro que se aproxima á obxectividade, o coñecemento e os valores na Ciencia
mércores, 25 de abril do 2012
A licenciada en Humanidades especializada no campo da
Filosofía, blogueira
e co organizadora do Foro INEO, Arantxa Serantes, vai presentar esta tarde na Sala
Lucernario da Fundación Eugenio Granell en Santiago de Compostela o seu
segundo libro editado a través de Meubook, Objetividad,
conocimiento y valores en la Ciencia. Análisis del planteamiento filosófico de
Ilkka Niiniluoto, texto que permite unha achega ao filósofo e matemático
finlandés Niiniluoto, pouco coñecido en España, e que realizou importantes
achegas á filosofía da Ciencia, en particular á aproximación da verosimilitude
ou a verdade. Tamén se abordan temas como o papel que xogan a ciencia e a tecnoloxía
na sociedade.
A publicación conta cunha portada de David Pintor e cun prólogo a cargo do
ilustre profesor Ildefonso Murillo, catedrático de Lóxica e Filosofía da
Ciencia na Universidade Pontificia de Salamanca.
O acto comezará ás 20:00 horas e contará coa presenza de Marcus Fernández
(Código Cero) e Ángeles Montecelo (Meubook), que arrouparán á autora na
presentación en sociedade dun libro que xa está dispoñible
para a súa adquisición a través da plataforma en liña de Meubook, onde
tamén é posible ler
o prólogo do libro e unhas breves palabras da autora como mostra do novo
volume.