Lingua de Amor premia con portátiles e videoconsolas aos namorados máis orixinais
martes, 28 de abril do 2009
Por terceiro ano consecutivo, e en vista
do éxito acadado nas edicións anteriores, o Consello da Xuventude de Galicia
(CXG), a través do seu Servizo de Normalización Lingüística e en colaboración
co Concello de Vigo, vén de por en marcha a III edición de Lingua de Amor, o concurso de cancións e
declaracións de amor a través do correo electrónico que premia aos “namorados e namoradas” máis orixinais á
hora de expresar os seus sentimentos na nosa língua.
Lingua de Amor ten como principal
obxectivo dinamizar o uso da lingua galega entre os máis novos e novas en
espazos de comunicación tan habituais para eles como son os correos electrónicos,
os chats, os foros…
Para participar no concurso, os
interesados deberán rexistrarse na páxina web oficial do evento e enviar unha
canción (na categoría musical non hai límite de idade) ou unha declaración de
amor en galego (categoría A de 14
a 19 anos, e categoría B de 20 a 35 anos).
A data límite para o envío das
declaracións é o vindeiro 10 de maio de 2009 e o período de votacións manterase
aberto dende o día seguinte ata o 17 de maio, Día das Letras Galegas.
Ademais da satisfacción de ter colaborado
nunha iniciativa sen igual para a promoción da nosa lingua, os gañadores de
cada categoría recibirán os seguintes premios:
Categoría
A:
1.º Un ordenador portátil
2.º Unha videoconsola PlayStation3
3.º Un Ipod
Categoría
B:
1.º Un ordenador portátil + unha cea para
dúas persoas
2.º Unha videoconsola PlayStation3 + unha
cea para dúas persoas
3.º Un Ipod + unha cea para dúas persoas
Asemade, todas as persoas escollidas polo
xurado, que estará composto pola presidenta do Consello da Xuventude de
Galicia, a concelleira de Igualdade, Xuventude e Normalización Lingüística do
Concello de Vigo e as técnicas de normalización lingüística do devandito
Concello, entre outras persoas, recibirán cadanseu lote de libros en galego.