Investigadoras galegas advirten das graves desigualdades que presenta o tecido tecnolóxico e científico
xoves, 19 de xaneiro do 2012
A nivel político, e en moitos outros niveis,
unha cousa é o que se di que se fai e outra ben distinta é o que finalmente se
fai. En materia de estratexias destinadas a fomentar a igualdade tivemos e
temos moito disto: unha manchea de iniciativas postas en marcha para impulsar o
papel da muller a nivel tecnolóxico e investigador e logo, segundo se pode ver
nas estatísticas e os estudos finais, resulta que non se avanzou case nada.
Isto foi o que pasou no período que vai de 2003 a 2009 en España, o treito de
tempo que lles serviu ás autoras dunha monografía, presentada estes días na
Universidade de Vigo, no que se avalía o peso das investigadoras galegas no conxunto
do Estado, un peso que foi baixando dende 2003 até hoxe, non habendo moitos
sinais que indiquen un cambio da tendencia a curto e medio prazo.
En definitiva, a muller segue a ter cada vez máis
presenza nas facultades ligadas ás disciplinas tecnolóxicas, científicas e
dixitais, pero isto non se reflicte, de ningún xeito, na obtención dun meirande
número de postos de responsabilidade nas empresas, institucións de toda índole
ou centros de investigación. Estes e outros datos figuran na monografía
titulada As mulleres no eido científico,
tecnolóxico e de transferencia do coñecemento en Galicia, un estudo
achegado en castelán que, amais de avaliar polo miúdo o acontecido no devandito
período de bonanza económica (o que vai de 2003 a 2009), advirte do que pode
acontecer nos vindeiros anos, coa crise económica aínda viva e con máis que previsíbeis recortes orzamentarios en materia
de ciencia, de TIC e de igualdade de
oportunidades.
O libro foi presentado este mércores no Campus de Ourense por María Lameiras,
vicerreitora do campus, e os seus autores, que son Alberto Vaquero, da
Universidade de Vigo; Sara Fernández, Milagros Vivel e Nélida Porto, da
Universidade de Santiago de Compostela; e Ana Jesús López e Almudena Fernández,
da Universidade da Coruña. “A pesares dos
significativos avances no campo da igualdade e do incremento nominal de
recursos, en Galicia as investigadoras perderon importancia relativa respecto
ao total nacional, caendo desde o 5,6% que representaban en 2003 ata un 4,8% en
2009”, advertiu Alberto Vaquero durante a súa intervención.
A obra, informa
polo miúdo a Universidade de Vigo na súa web, describe á investigadora
galega como unha muller de entre 25 e 35 anos, que en unha elevada porcentaxe
(71%) non ten fillos e se os ten é nun número inferior aos dos seus compañeiros
varóns. Segundo a monografía, os homes sitúanse tamén nos postos máis altos no
campo da ciencia e a investigación e posúen unha formación menor que as
mulleres para acceder a postos de máis responsabilidade. As diferenzas laborais
tamén quedan constadas en esta monografía, onde se recolle que as
investigadoras teñen un contrato indefinido nun 53% dos casos fronte a un 75%
dos homes.