Intermax: cobertura para onde non chegan as grandes operadoras

Cada vez son máis os mozos e mozas que, unha vez rematados os seus estudos, deciden matricularse nunha academia para, durante uns 4 ou 5 anos (como mínimo), dedicarse a memorizar leis que os leven a aprobar unhas oposicións e vivir o máis comodamente posible, cun posto fixo e un soldo decente para toda a vida.
Afortunadamente, non todos pensamos da mesma maneira, e son moitos no noso país os mozos con iniciativa que deciden lanzarse a fundar a súa propia empresa e beneficiar ao mundo coas súas ideas innovadoras.
Un exemplo disto é Javier Mouriño, un mozo estudante de bioloxía interesado nas novas tecnoloxías, que con tan só 21 anos, decidiuse a montar a súa propia empresa coa que levar cobertura de Rede ao rural galego; xusto onde ás grandes empresas instaladas no noso país non lles interesa chegar.
Trátase de Intermax, unha empresa pioneira especializada en tecnoloxía sen fíos que, dende a súa fundación, conta cos mellores profesionais en redes Wi-Fi e WiMAX para o desenvolvemento do seu servizo.
Máis polo miúdo, Intermax ten á súa disposición un equipo de instaladores, técnicos, informáticos e enxeñeiros, que “levan máis de 20 anos no mundo das telecomunicacións”, e que, segundo indican, agora póñense ao servizo da poboación do rural galego para prestarlle un servizo básico que non lle prestan as grandes operadoras: Internet.
A empresa, que ofrece cobertura en máis de 60 concellos galegos, conta coa rede sen fíos Wi-Fi-WiMAX “mais extensa do territorio, con preto de 4000 km² de zonas de cobertura, “instalada con equipos de ultima xeración”, indican.
Dende a súa posta en marcha, a comezos do 2008, Intermax fidelizou máis de 7.500 clientes, entre particulares e empresas, que se conectan á Rede a través do seu sistema; e converteuse na empresa provedora de Internet de banda larga para máis de 20 parques eólicos da nosa comunidade.

Cobertura da rede de Intermax nos seus inicios

Algúns dos concellos nos que esta empresa galega ofrece cobertura de banda larga cen por cento son Melide, Láncara, Triacastela, Samos, As Nogais, As Pontes, ou O Páramo… e así ata chegar a un total de 30 concellos, limítrofes aos que gozan de cobertura total.
Asemade, dende finais do pasado ano, a empresa está comezando a dar os seus primeiros pasos alén dos nosos lindes, instalando redes noutras comunidades como Huesca ou mesmo Arequipa, a segunda cidade máis poboada de Perú.
Segundo explican os seus responsables, “a maior parte das redes empregan tecnoloxía que cumpre os estándares 802.11 A N empregando antenas de dobre e triple polarización na banda libre de 5 Ghz, o que permite ofrecer velocidades a clientes de ata 300 Megas reais”.
En resumo, o que esta empresa galega ofrece non é máis que Internet de banda larga con cobertura óptima, algo do que xa gozan moitos internautas das grandes cidades, pero que segue a ser unha utopía para os que vivimos en concellos pequenos ou no rural.
A súa vantaxe radican en que, grazas a un microrrepetidor que pode mover ata 100 Mbps e cubrir ata 15 Km de radio, pode conectar con boa calidade a tódolos veciños dun concello “a un prezo moi reducido”, aseguran.