Ineo asesorou a preto de 580 empresas da nosa terra nos seus procesos de dixitalización
xoves, 14 de xullo do 2022
Ineo,
a asociación galega de empresas TIC da nosa terra que preside Luis
Sestelo, fixo balance da actividade xerada a través da súa Oficina
Acelera PEME (OAP), posta en marcha en colaboración coa entidade
estatal Red.es. Segundo fixo saber Ineo, a través deste servizo
asesorouse no últimos nove meses a un total de 578 empresas para
“fomentar o proceso de dixitalización”. Isto concretouse en
labores de apoio, orientación e impulso de transformación dixital
ao servizo das empresas galegas. A OAP de Ineo habilitouse o pasado
mes de setembro.
A
través da oficina, a asociación promoveu nos últimos nove meses
diversas xornadas de dinamización tecnolóxica e 32 obradoiros para
a sensibilización e demanda de tecnoloxía. Un total de 1.963
persoas inscribíronse até o momento nestes talleres cuxos
obxectivos pasan pola mostra de solucións tecnolóxicas dixitais,
casos de éxito de dixitalización, explicación de axudas e
subvencións para a implantación de tecnoloxía ou calquera temática
para unha empresa que teña interese en levar a cabo un proceso de
transformación dixital.
Ineo,
amais de despregar unha ampla actividade desde a Oficina Acelera
PEME, tamén está a destinar unha especial atención na tracción de
Fondos de Recuperación (Next Generation) para o sector TIC
(Tecnoloxías da Información e a Comunicación) en Galicia. Entre os
programas enmarcados nestes fondos atópase o Kit Dixital.
Como
axente dinamizador de negocio, a asociación conseguiu a través da
súa Oficina de Proxectos promover iniciativas e programas por valor
de 766.847 euros que repercutiron directamente nas súas empresas
socias. “Esta cifra”, imnformou Ineo, “pon de manifesto o
importante retorno que recibe o conxunto do noso corpo asociativo”.
Ademais, no ámbito laboral, o programa integral de emprego executado
por Ineo incluíu un total de 75 accións colectivas de formación e
capacitación, superou as 2.400 horas de formación e propiciou máis
de 460 sesións individuais de orientación laboral. O 64% dos seus
participantes atopou traballo durante o programa, xa que se xeraron
70 ofertas laborais grazas ás sinerxías establecidas entre Ineo e
máis de 50 empresas.