Guild Wars 2 supera os 3 millóns de copias vendidas

Para facer fronte ao imparable World of Warcraft en 2012 chegou ao mercado Guild Wars 2, xogo masivo en liña que como principal característica ten a ausencia de cotas mensual para poder xogar, o que está a valerlle o apoio de moitos xogadores de todo o mundo, como veñen de confirmar dende ArenaNet ao anunciar que superaron os 3 millóns de copias vendidas, fito que aproveitan para anunciar algunhas das actualizacións que terá o xogo durante o ano que comeza.
Guild Wars 2 continuará a incorporar novas actualizacións, mapas e eventos en todos os niveis cada mes, así como novas táboas de clasificación para permitir que os xogadores comparen os seus resultados e novos logros para manter a sensación de reto no xogo.
É de agardar que o bo ritmo de mantemento contribúa tanto á captación de novos xogadores como á consolidación dos actuais, retos que a meirande de xogos deste xénero non conseguen superar, de aí que nos últimos meses distintos títulos tiveran que mudar o seu modelo de negocio a fórmulas Free-to-Play, algo do que polo momento Guild Wars 2 está bastante lonxe, gañando a pulso a súa posición como principal competidor de World of Warcraft.