Gradiant ponse ao servizo das empresas galegas de cara á participación nos fondos de Conecta PEME
mércores, 4 de setembro do 2013
O centro galego de I+D
Gradiant informou esta semana
de que está a piques de abrirse a convocatoria para o programa
Conecta PEME da Axencia Galega de Innovación (GAIN), dotado con 12
millóns de euros procederes de fondos europeos FEDER. Esta programa,
informa Gradiant, é moi semellante aos Innterconecta, do que xa
temos falado polo miúdo en Código Cero, sobre todo facendo fincapé
nas cifras que achega a segunda convocatoria destes fondos: 153
millóns de euros para uns oitenta proxectos galegos de innovación.
Con todo, hai unha diferenza básica entre unhas achegas e outras: as
de Conecta PEME diríxense principalmente, como o seu propio nome
indica, ás pequenas e medianas empresas galegas. Para optarmos a
estas axudas de fortalecemento da innovación, os consorcios terán
que contar co apoio dun centro tecnolóxico.
Neste senso, Gradiant
lembra aos aspirantes e interesados que atesoura unha gran
experiencia en proxectos desta feitura, sendo como é, recórdanos,
“o centro TIC con meirande número de iniciativas impulsadas a
través de Innterconecta”. Ademais, dinos, no seu portfolio conta
con numerosos casos de éxito de transferencia tecnolóxica e
Investigación e Desenvolvemento aplicados ao tecido produtivo,
chegando o radio de alcance dos seus proxectos aos mercados de
España, Latinoamérica e máis Estados Unidos. A maiores, dispón de
máis de 80 investigadores de seu e, tamén, ao servizo das empresas
galegas centradas nas tecnoloxías ou no coñecemento en calquera das
súas manifestacións.