Gradiant e Mática xuntan forzas para levar a calidade do dato ao día a día das empresas
martes, 10 de maio do 2022
O
Centro Tecnolóxico Gradiant e Mática Partners (grupo catalán
centrado en resolver desafíos mediante o uso responsábel da
información, a tecnoloxía e a Intelixencia Artificial) veñen de
unir forzas para garantir a calidade dos datos e facilitar a toda de
decisións nos negocios. Froito deste traballo conxunto é o Aqtiva,
unha ferramenta que permite importantes aforros de tempo e unha
información máis precisa a nivel empresarial, favorecendo a toma
das mellores decisións.
Aqtiva
é a primeira spin-off da empresa catalá e constitúe un
paradigma da democratización do Big Data, unha tecnoloxía
que se ben está ao alcance de moitas empresas, “poucas contan con
mecanismos que aseguren a calidade dos datos á entrada dos sistemas
de soporte para a toma de decisións”, explica Juan Ramón
González, director executivo de Aqtiva, quen engade que a tecnoloxía
posta en xogo posibilita aforros de tempo e diñeiro ao aplicar
técnicas avanzadas de análise e Intelixencia Artificial “para
garantir a calidade dos datos que entran no sistema”. Ademais,
prosegue, permite procesar grandes volumes de información en
streaming, en tempo
real ou similar, adaptándose ás esixencias empresariais onde a
calidade do dato é esencial para o correcto funcionamento da IA.
“Desta forma, asegurámonos de que toda a información que se
introduce no sistema ten a calidade apropiada”, explica Agustín
Cañas, director de Sistemas Intelixentes de Gradiant.
A
colaboración entre o centro tecnolóxico galego e Mática
desenvolveuse no marco do proxecto IA2CD, co-financiado na
convocatoria I+D Transferencia Cervera do CDTI, que ten como
obxectivo “deseñar e desenvolver unha solución integrada baseada
en Intelixencia Artificial aplicada á calidade do dato”.
Segundo
engaden Gradiant e Mática, “a característica diferencial de
Aqtiva é que non se aplican técnicas de calidade dos datos unha vez
que estes están no propio sistema, senón no momento en que viaxan
polo sistema, é dicir, no momento da inxesta ou a súa
transformación”. Tamén fan saber que a calidade do dato é un
factor “crucial” cando falamos de procesamento de datos en
streaming, en tempo real ou similar: “En poucas palabras,
non hai tempo para perfilar, corrixir ou modificar datos que xa
entrasen na base de datos”, comenta Marc Serra, presidente de
Aqtiva. Pola súa banda, Agustín Cañas explica que “o noso
algoritmo integrado en Aqtiva permite analizar un gran volume de
datos e proporciona recomendacións acerca da calidade dos mesmos, de
tal maneira que unicamente entrará no sistema aquela información
relevante para a toma de decisións”.