GALPon pon en probas a beta primeira de MiniNo Queiles 3.0
martes, 19 de xaneiro do 2016
A asociación
GALPon vén de habilitar a versión de probas (beta 1) do sistema en
desenvolvemento MiniNo Queiles 3.0. A versión está
xa descargábel dende o portal de MiniNo con formato de imaxe ISO
e ficheiro MD5 para quen queira probar as novidades que pon en xogo e
“informar de calquera cuestión ou problema que se detecte”.
Precisamente entre os elementos que introduce a versión atópase a
instalación de Cronopete,
ferramenta destinada a paliar unha posíbel perda de información no
disco duro. “Tendo en conta que as máquinas obxectivo desta
distribución adoitan seren bastante vellas é frecuente que teñamos
temor á perda de datos por seren o disco tamén moi vello”,
advirten dende GALPon.
Segundo engaden,
Cronopete é un programa “moi sinxelo” para realizar copias de
seguridade do noso cartafol persoal. E explican: “Trátase dunha
ferramenta semellante a Time Machine de Mac e ten unha
interface moi simple”. Na pantalla principal atoparemos información
sobre a última copia de seguridade realizada con Cronopete e a
vindeira copia programada para realizar coa aplicación. A aplicación
xestiona as copias de seguridade do sitio /home podendo eliminar da
copia de seguridade algúns cartafoles que non queiramos que se
copien.
Amais disto, a versión
de probas de MiniNo Queiles 3.0 inclúe a novidade de instalar “unha
potente ferramenta de ordes de consola”, Inxi,
que posibilita extraer datos doados de entender sobre o hardware, a
configuración e o software instalado no equipo.
Lembrar que MiniNo
Queiles 3.0 é un novo paso ao
abeiro de GALPon MiniNo, unha distribución de GNU/Linux creada
para executarse en equipos con poucos recursos hardware ou obsoletos
(até 10 ou 12 años de antigüidade). Da mesma raizame xurdiu tamén
PicarOS, distribución multipropósito enfocada ao ensino e concibida
como un sistema lúdico para nenas e nenos de idades comprendidas
entre os 3 e os 12 anos.