Final Fantasy VII Rebirth chega a PS5

Tras Final Fantasy VII Remake son moitos os xogadores que quedaron pendentes da súa secuela, Final Fantasy VII Rebirth, que hoxe chega a PlayStation 5 acompañado por un grande éxito de crítica (en España recibiu un 10 de Vandal e un 9,7 de Meristation, mentres que no Xapón a revista Famitsu outorgoulle unha valoración de 38 sobre 40).
En Final Fantasy VII Rebirth meterémonos na pel do mercenario Cloud Strife e dos seus compañeiros, que perseguen ao lendario guerreiro Sefirot, unha figura do pasado de Cloud que pretende dominar o planeta, por un fascinante mundo enorme e cheo de perigos, aventuras, ledicias e dúbidas.
Estes insólitos heroes, entre os que se atopan os inesquecibles personaxes de Tifa, Barret, Aeris e Red XIII, unen as súas forzas ás de novos compañeiros, como a enérxica ninja Yuffie e o bromista robot felino Cait Sith. Final Fantasy VII Rebirth ofrécenos unha experiencia inesquecible chea de viraxes sorprendentes, personaxes memorables e escenarios que deleitarán e deixarán abraiados a afeccionados de sempre e aos recentemente chegados por igual.