Fene ofrecerá Internet sen fíos no seu territorio
martes, 26 de abril do 2011
Algunhas
vilas e concellos galegos semellan estar a tomar conciencia da importancia de
ter unha boa conexión á Rede nos seus núcleos (por enriba incluso de ter boas
estradas e accesos físicos) e paseniñamente están a implantar redes Wi-Fi para
o seu uso público por parte da veciñanza.
É o caso
de Cee e Redondela, vilas das que
falamos hai escasamente un mes por
implantar a devandita tecnoloxía no seu rural, ás que agora se lle suma
tamén Fene, o Concello coruñés que vén de instalar nove puntos de acceso a
Internet sen fíos na súa contorna.
Trátase
dunha rede Wi-Fi á que se poderá acceder de balde nos vindeiros días, tal e
como sinala
o alcalde socialista Iván Puentes no xornal La Voz de Galicia.
Este
Concello instalou distintas antenas espalladas polo seu territorio, coas que
dará servizo de Internet a toda a veciñanza que o desexe, segundo informan no
devandito xornal, “sen pagar un só euro”.
O sistema, que contou
cun investimento de 130.000 euros sufragados con cargo ao Plan E do 2010, está
en fase de probas e xa se pode usar dende a praza do concello, o parque
Castelao, a praza da Cooperación, San Valentín e a praza Verde de Perlío; así
como nas zonas rurais de Sillobre, Magalofes, Barallobre, Maniños e Limodre.