Emprego e a Fundación Ronsel impulsan unha nova edición das súas rutas xacobeas emprendedoras e innovadoras
martes, 12 de abril do 2022
A
Consellería
de Emprego e a Fundación Ronsel presesentaron este luns 11 en
Ourense unha nova edición do proxecto Galicia Camiño Emprendedor,
destinado a impulsar o talento emprendedor na nosa terra cunha
proposta itinerante de mentoring vencellada á rede xacobea. A
nova edición deste programa innovador será posíbel grazas a un
acordo entre a Consellería de Emprego, a Axencia Turismo de Galicia
e a Fundación Ronsel. Arrincará os vindeiros días 26 e 27 de abril
polo Camiño Francés; e en xuño recalará unha vez máis en
Ourense, a través da Vía da Prata, ruta Xacobea na que Ourense é a
porta de entrada.
En
total, realizaranse unha ducia de treitos de mentoring e
innovación tecnolóxica. De feito, 12 etapas, 12 retos
é o lema escollido para esta nova convocatoria, nas que os
participantes poderán mellorar os seus proxectos e xerar contactos
profesionais para avaliar cadanseus modelos de negocio e elaboraren
un novo plan de acción. Nesta edición está prevista a
participación dunhas 200 persoas entre emprendedores e mentores.
Os
retos que se propoñen acadar nesta ocasión están en liña cos
Obxectivos de Desenvolvemento Sustentábel (ODS). O obxectivo,
segundo fixo saber a conselleíra de Emprego, María José Lorenzana,
é “difundir estes retos e convidar aos participantes a integrar
polo menos un deles nos seus obxectivos empresariais”. O programa
rematará en decembro en Santiago de Compostela, “coincidindo coa
capitalidade da economía social que este ano ostenta a cidade
galega”, explicou, engadindo que o proceso de mentoring é
“a clave deste programa que supón unha fórmula multiplicadora do
talento que cimenta unha Galicia máis capacitada e cohesionada, na
que o intercambio de experiencias profesionais e vitais contribúan a
facer do emprendemento unha forza impulsora en Galicia”.