Emilio Duró participará na tarde do venres nunha charla organizada polo CPEIG en Compostela

Emilio Duró participará nas charlas organizadas polo CPEIG

Este venres ás 6 da tarde na Facultade de Ciencias de Comunicación en Santiago de Compostela botará a andar o Ciclo de charlas sobre tecnoloxía, liderado e intelixencia emocional organizado polo Colexio Profesional de Enxeñaría en Informática de Galicia (CPEIG) cun relatorio de Enrique Duró, profesor que acadou grande repercusión na Rede grazas á forza das súas charlas e polas súas aparicións televisivas, que falará sobre A xestión da ilusión e o coeficiente de optimismo en épocas de cambio.
Licenciado en Ciencias Económicas e Master en Administración de Empresas pola Escola Superior de Administración e Dirección de Empresas (ESADE), Duró dedica parte do seu tempo ao estudo da aprendizaxe en idades temperás e, mediante experiencias e anécdotas, adoita demostrar que os fracasos profesionais raramente se deben a causas técnicas e si, en cambio, ao desenvolvemento emocional.

Luis Huete pechará o ciclo de conferencias o 18 de xuño

O ciclo de charlas completarano Enrique Dans e Luis Huete, e xa na páxina web do CPEIG xa está dispoñible o formulario de inscrición a todas ou cada un dos relatorios que terán lugar os días 27 de maio e 10 e 18 de xuño.
A intervención de Enrique Dans o día 10 de xuño no auditorio da Facultade de Ciencias da Comunicación de Santiago leva por título Novos escenarios tecnolóxicos: poñéndonos as pilas.; mentres que Luis Huete pronunciará a súa charla o día 18 de xuño, baixo o epígrafe Transformando organización ao ritmo dos mercados.
Este ciclo de charlas, programado en colaboración coa Xunta de Galicia, está dirixido a complementar os coñecementos técnicos dos executivos de empresas e de todas aquelas persoas que participan en organizacións coa finalidade de mellorar a súa calidade de vida mediante a potenciación das aptitudes fundamentais, a través da consideración do capital humano como recurso na procura de vantaxes competitivas.