Educación aposta polo software libre para a súa plataforma de correo electrónico
martes, 3 de marzo do 2009
A Consellaría de Educación e Ordenación Universitaria vén de
facer pública a intención de migrar a súa plataforma de correo electrónico
corporativo a unha arquitectura baseada en software libre, para o que publicou o
anuncio de licitación por procedemento
aberto e tramitación ordinaria para a contratación do servizo no DOG do pasado
23 de febreiro, onde se recollen as bases da resolución.
Así o recolle a web de Mancomún, onde destacan que tódolos
desenvolvementos realizados pola empresa licitadora para a ejecución do servizo
“deberán ter unha licenza compatible coa
GPL e recoñecida pola FSF”.
Asemade, Mancomun.org
recolle que os desenvolvementos incorporados que sexan realizados por terceiros
“deberán ser tamén unha licenza libre, aínda
que neste caso admítese calquera das licenzas recoñecidas pola FSF ou pola OSI”.
As empresas ou entidades interesadas en levar a cabo esta
migración deberán entregar toda a documentación que se require no anuncio do
DOG así como unha licenza
de documentación libre recoñecida pola FSF e en formato ODF
(OASIS Open Document Format, norma ISO/IEC 26300).
Mancomún tamén achega as características que debe ter o
servizo licitado e que son, entre outras, as seguintes: a migración da
plataforma actual de correo sen perda de información asociada ás contas de
correo electrónico existentes; a integración dun sistema de listas de
distribución, dun sistema de notificación contra o spam (ambos integrados na
interface web do correo que deberá cumprir o estándar WAI-AA da W3C); a integración
dun mecanismo de copias de seguranza para o sistema e as caixas de correo; a instalación,
configuración e parametrización da solución dentro do hardware proporcionado
pola Consellería; a formación ao persoal que designe a Consellería na
arquitectura; a parametrización e explotación do novo sistema de correo
implantado e o servizo de soporte técnico a partir da posta en produción do
sistema e durante un período de 2 anos.
O orzamento base de licitación asignado é de 200.000 euros e
o prazo de presentación de ofertas remata o vindeiro 10 de marzo de 2009.
Os pregos de cláusulas administrativas e condicións técnicas
pódense consultar na web de licitacións da Xunta.