Economía velará pola seguridade dos produtos ofertados na Rede
martes, 12 de marzo do 2019
O
Goberno galego quere que os consumidores estean máis protexidos en
materia de comercio electrónico. Con este obxectivo, a Consellería
de Economía, Emprego e Industria vén de activar o
primeiro Plan de inspección do comercio dixital, que velará, en
palabras do departamento que dirixe Francisco Conde, “polos
dereitos dos consumidores e a seguridade dos produtos ofertados na
Rede”.
En
termos máis concretos, “búscase comprobar o grao de cumprimento
da legalidade vixente ao abeiro do comercio e o consumo a través dos
servizos web específicos para estas actividades”, que, segundo
Economía e Emprego, serán analizados e inspeccionados con
regularidade.
Outro
dos obxectivos do plan é optimizar a información que recibe o
consumidor a través de Internet, tanto dos produtos ofrecidos como
dos seus dereitos e obrigas; amais de garantir a calidade e a
seguridade os produtos ofertados na Rede.
O
plan estará vixente durante todo o ano, e desenvolverano de xeito
coordinado os servizos de inspección de Comercio e de Consumo.
Realizaranse un total de 800 controis da información e publicidade
en páxinas web, e recolleranse mostras dun mínimo de 70 produtos
adquiridos a través da rede.