EGANET e Caixa Galicia unen forzas para rachar coa fenda dixital
luns, 1 de febreiro do 2010
A Asociación de Empresas Galegas adicadas a Internet e ás Novas Tecnoloxías
(EGANET) e Caixa Galicia, veñen de reunirse esta mesma mañá para tratar de
chegar a un acordo de colaboración e contribuír xuntos ao obxectivo común de
desenvolver o sector TIC galego, difundir a sociedade da información e reducir
a fenda dixital existente no noso país, tres metas que, de telas acadado,
mellorarán considerablemente o día a día de tódolos galegos e galegas.
A xuntanza concluíu coa sinatura dun convenio por parte de Beatriz Legerén,
presidenta de EGANET, e Marcelino Fernández Mallo, director de Banca Virtual de
Caixa Galicia, que se comprometeron para, entre outras cousas, rachar coa fenda
dixital existente entre o interior e a costa do noso país, no Centro On de
Caixa Galicia en Santiago.
Mediante este convenio, Caixa Galicia pon a disposición de EGANET a súa
rede de infraestruturas, acondicionadas para acoller eventos relacionados coa
promoción da sociedade da información e a industria TIC, algo que, segundo
explicou a presidenta de EGANET, iso significa “a posta a disposición do tecido TIC galego de locais nas sete cidades
galegas cun aforo conxunto que se aproxima ás 2.000 prazas”.
Asemade, a través da Oficina Virtual On Caixa Galicia, a entidade ofreceralles
ás empresas socias de EGANET unha oferta financeira en condicións especiais que
se recollerá nunha páxina web personalizada e específica e que dará acceso á
contratación dos distintos produtos e servizos incluídos na oferta. A este
respecto, Beatriz Legerén agradeceu o apoio da caixa galega ás empresas TIC,
que precisan, segundo dixo, “do respaldo
bancario para levar a bo porto os seus proxectos coma o resto do tecido
industrial”. A presidenta de EGANET recoñeceu que o sector TIC é un sector “complexo, que aínda non se fixo accesible á
sociedade”, e achegou o compromiso de avanzar nesta tarefa, xa que,
apuntou, as TIC son “imprescindibles para
o desenvolvemento do resto de sectores de actividade e para a mellora global da
economía”.
Pola parte da Asociación de Empresas Galegas
Adicadas a Internet e ás Novas Tecnoloxías, o convenio establece o compromiso
de publicitar a través da web e do resto de medios ao alcance de EGANET a
sinatura deste convenio, así como manter un enlace permanente á web
personalizada, á que se accederá a través de contrasinal. A presidenta de
EGANET agradeceu a disposición de Caixa Galicia a colaborar co sector TIC e
reiterou o compromiso da Asociación de aproveitar os medios facilitados pola
entidade para avanzar na mellora competitiva do sector e de achegar as TIC á
sociedade, obxectivo xa fixado nos estatutos da asociación.