Dispoñíbel un trivial para smartphones que aborda a corrupción en España
martes, 11 de xuño do 2013
Hai que rirse de todo,
mesmo da corrupción política. Pero iso si: rirse non implica
perdoar nin indultar. A xustiza ten que ser ben firme cos
prevaricadores e os traficantes de influencias, deixándonos marxe a
nós para pasar un bo rato con cousas como Pregunticas,
un novo trivial para dispositivos intelixentes que centra unha das
súas categorías estrela na devandita temática da corrupción en
España, mesmo chegando a incluír preguntas sobre o peite de
Bárcenas, a tarma Gürtel ou o caso Nóos, entre outros máis temas
vergoñentos.
Pregunticas, case
con toda probabilidade o primeiro xogo para móbiles destas
características (con cuestións específicas sobre a corrupción en
España, un tema que por desgraza dá para moito, e sen que sexa
preciso ollar cara ao lonxe), inclúe máis de 60.000 preguntas
distribuídas en 24 categorías. Segundo contan os seus responsábeis,
na súa primeira semana xa se converteu nunha das apps máis
descargadas do App Store, tanto para iPhone como para iPad. Unha
destas categorías está dedicada en exclusiva ao tema dos ladróns
dos despachos oficiais: "Esta é unha categoría que dá
moito xogo, xa que nos tempos que corren, por desgraza,
vanse engadindo preguntas case cada día", explica un dos
creadores do xogo, Sergi Solé. Pero non todo é corrupción no
Pregunticas: Ademais desta categoría, os seus creadores
engadiron ingredientes “de interese” como por exemplo
logotipos de diferentes marcas ou vídeos de programas de televisión
das pasadas décadas.