Da comezo en Santiago, o II Congreso de Turismo e Novas Tecnoloxías
martes, 9 de decembro do 2008
O Pazo de Congresos e
Exposicións de Santiago de Compostela acolle, dende hoxe, un encontro
dirixido a profesionais e empresarios do sector turístico interesados en
coñecer as aplicacións das novas tecnoloxías para o desenvolvemento e mellora
das empresas turísticas.
Trátase do II Congreso de Turismo e
Novas Tecnoloxías, que organiza a Dirección Xeral de Turismo da Consellaría
de Innovación e Industria, e que nesta ocasión está enfocado cara os
empresarios do sector turístico en xeral e aos integrantes do sector hostaleiro
e empresarios de turismo rural en particular.
No programa previsto para as dúas
xornadas desta edición cabe destacar a presenza de profesionais galegos
(axencias de receptivo e membros da plataforma Vindeira) e outros relevantes profesionais
do sector procedentes doutros países e que traballan en empresas de recoñecido
prestixio como Google Travel Spain.
Asemade,
esta mesma tarde (ás 16:00 horas) acudirá ao evento o director xeral de
Investigación, Desenvolvemento e Innovación, Salustiano Mato de la Iglesia, para moderar unha
mesa redonda sobre exemplos prácticos de novas tecnoloxías aplicadas ao
turismo.
O obxectivo último
do congreso é “dar a coñecer aos
profesionais do sector turístico galego, a través de experiencias prácticas e
reais, as posibilidades que lles pode ofrecer a aplicación das novas
tecnoloxías aos seus ámbitos de traballo”. O seminario consta de dúas
xornadas completas, distribuídas en sesións teóricas de mañá e prácticas de
tarde. Nas sesións teóricas inclúense conferencias de expertos que amosarán as
súas potencialidades de aplicación das tecnoloxías da información e da
comunicación aos diferentes eidos nos que desenvolven o seu traballo os
profesionais do turismo.
Asemade, non
faltarán as mesas de discusión para que os expertos poidan debater e compartir
experiencias e opinións cos profesionais asistentes. Nas sesións prácticas
haberá presentacións de exemplos reais de aplicación das novas tecnoloxías ás
empresas turísticas.
Os
asistentes tamén experimentarán un coñecemento in situ de novas formas de promoción, comercialización e
información mediante a aplicación das TIC.