Clos inaugura o I Foro Internacional da Industria de Contidos Dixitais

O ministro de Industria, Joan Clos, vén de inaugurar esta mesma mañá o I Foro Internacional da Industria de Contidos Dixitais (FICOD 2007), que se celebra no recinto feiral IFEMA en Madrid xunto con SIMO, a Feira Internacional de Informática, Multimedia e Comunicacións. O devandito Foro enmárcase dentro do Plan Estratéxico deseñado polo Goberno para axudar ó sector a afrontar os retos que xurden dos novos modelos de negocio e explotación dos contidos dixitais.
Ó longo do acto de presentación, Clos fixo entrega dos I Premios FICOD 2007 á innovación a 20 empresas españolas polos seus proxectos e iniciativas relacionadas coa creación, a producción e a distribución de coñecemento e servizos.
As empresas premiadas foron: Bable Dreams S.L., Dorna, EGEDA, Explora Films, Federación de Asociacións de Xornalistas de España (FAPE), Geovirtual S.L. Ilion Studios S.L., Lanetro, Mobile Dreams Factory S.L., MXP Digital, Nikodemo Animation, Parmenion, Perro Verde Films, Proein, Radio Televisión Española (RTVE), SGO, Techfoundries, TV3, Yelmo Cineplex e Zinkia.