Cae un 1,5% o gasto en TIC dos fogares españois
xoves, 10 de maio do 2012
De acordo co estudo de demanda e uso de servizos de
Telecomunicacións e Sociedade da Información realizado polo Ontsi, o gasto en
servizos TIC realizado polos fogares españois no cuarto trimestre de 2011, “ascendeu a 3.313 millóns de euros”, un
1,5% menos que no mesmo trimestre do ano anterior.
E é que a caída xeneralizada do consumo no noso país e
en toda Europa, facíanos presaxiar que a tendencia non ía ser outra no tocante
ás novas tecnoloxías, en case que tódolos seus sectores.
Deste xeito podemos comprobar como o gasto en telefonía
fixa descendeu un 3,5% ata situarse nos 920 millóns de euros, e a media de
minutos consumidos durante o trimestre reduciuse en 36 minutos no último ano.
No tocante á telefonía móbil, o gasto reduciuse un
2,6%, cunha diminución de 1,8 euros no gasto medio mensual por fogar, ata
situarse nos 37,1 euros.
Pola súa parte, os fogares gastaron 628 millóns de
euros no servizo de Internet, cunha variación interanual positiva do 1,5%. Máis
polo miúdo, o gasto medio po fogar situábase en 23,9 euros ao mes no último
trimestre do ano, o que representa unha redución de 1,8 euros.
O estudo destaca, asemade, que a conexión á Rede nos
fogares a través do móbil situouse por enriba do 15% ao final deste período.
O que si non descendeu, senón que incluso se
incrementou algo foi o gasto total dos fogares con servizos de televisión de
pago, que aumentou un 5,4% no último trimestre.
Xa que logo, o gasto medio mensual acadou os 29,5
euros, o que supón uns 0,3 euros máis que o ano anterior.