COINTEGA constata a necesidade de impulsar o ecommerce entre as nosas firmas téxtiles
xoves, 24 de novembro do 2016
- Presentación do informe de COINTEGA en Compostela/ Imaxe de La Voz de Galicia
Onte
presentábase en Santiago un estudo sobre o nivel de afianzamento nas
novas tecnoloxías no sector téxtil galego, tanto no que atinxe a
produtores-distribuidores como a nivel de compradores. A
análise, presentada por COINTEGA (Confederación de Industriais
Téxtiles de Galicia), vén acompañado do seguinte epígrafe:
Informe situación ecommerce empresas galegas téxtil moda.
Foi dada a coñecer ao abeiro da Xornada Novas Tendencias de
eCommerce, na que participaron Venche Privee, Modaes.es e Banco
Sabadell. O informe elaborado pola Confederación avaliou a
importancia do comercio electrónico como canle de distribución. En
palabras da entidade, “fai fincapé no importante que é que a nosa
empresa sexa visíbel en Internet de cara a conseguir un óptimo
emprazamento e poder incrementar o volume de vendas online”.
Entre outros datos, achégase a seguinte información de valor: aínda
que a maioría das firmas analizadas contan con páxina web, menos da
metade vende na Rede.
Nun
plano máis concreto, a análise (feita sobre un censo de 75
sociedades con sede na nosa terra) engade que preto da metade (o 45%)
das firmas do sector galego teñen tenda dixital de seu, aínda que
unha boa parte das mesmas teñen presenza en Internet botando man
doutras canles indirectas. Iso si: a cifra de empresas que venden a
través destas contornas é mellorábel.
Na
xornada tamén se presentou o Barómetro Venche-Privee de empresas
de moda en España, un achegamento pormenorizado ás compañías
do sector para coñecer as claves do negocio actual, agora que, en
palabras dos autores, “vívese un intre de clara recuperación
económica”. A investigación centrouse desta volta en identificar
“aqueles novos factores que empezan a impactar con forza no negocio
da moda”.