CAI Sistemas Informáticos publica un estudo pormenorizado sobre a asesoría galega
martes, 18 de xaneiro do 2011
A firma
viguesa CAI Sistemas Informáticos,
especializada en produtos e servizos tecnolóxicos para o eido das asesorías e
as xestorías, vén de ampliar a súa oferta cos clientes a través dun estudo
pormenorizado da realidade actual de todo o sector que atende. A empresa,
que amais de mellorar o seu servizo quere encher o que considera un oco
importante de información sobre esta materia, contou para este traballo en
concreto coa colaboración do Colexio Oficial de Titulados Mercantís e
Empresariais de Galicia.
Froito
desta cooperación xurdiu polo tanto o primeiro estudo de mercado do sector
galego da asesoría, titulado As Asesorías
na Comunidade Galega e inserido na publicación de estudos Sinerxía
Empresarial.
A
investigación, informa CAI, levouse a cabo integramente por persoal da propia
firma de Vigo, que é socia de Ineo, ao longo dun período de cinco meses en que se desenvolveron,
entre outras tarefas, máis de 400 enquisas a outras tantas asesorías nas
cidades da Coruña, Ferrol, Santiago, Lugo, Ourense, Vigo e Pontevedra. “Tras unha fonda análise do sector”,
engaden, “traballando con diferentes
fontes de información que complementaron as enquisas, o estudo presentouse con éxito
na segunda edición das Xornadas de Asesores de Empresas organizadas por CAI en
Vigo”.
O resultado é polo tanto un estudo único na nosa terra
polas súas características e polo seu alcance, de interese non só para os
colexiados da devandita entidade oficial, senón tamén para todas as persoas
vinculadas ao sector das asesorías de empresas e a consultoría informática e
tecnolóxica.