Barrán prepara en Santiago e A Coruña un completo programa de accións formativas sobre software libre
venres, 12 de xullo do 2013
A nova emprega galega Grupo
Barrán vai organizar os meses vindeiros unha
serie de actividades de formación e difusión de software libre.
Para comezar, celebraranse dous cursos de verán sobre programación
aberta, un de GNU/Linux e outro de aplicacións libres de uso xeral,
que xa teñen aberto o prazo de inscrición. Esta liña formativa
complementarase cos seminarios Emprender con software libre, a
desenvolver no mes de setembro, o primeiro no Centro de Novas
Tecnoloxías de Galicia (Santiago) e o segundo no centro Ágora da
Coruña.
Volvendo aos cursos, dicir que se van desenvolver
durante os meses de agosto, setembro e outubro, cunha duración de 72
horas cada un e impartidos con formato presencial en Santiago de
Compostela. A oferta de prazas é limitada, e o custe dos cursos é
de 20 euros ao mes. As persoas interesadas en obter máis información
ou inscribirse nestas achegas deben contactar coa empresa a través
do formulario
de contacto ou de inscrición. O programa dos cursos inclúe
aspectos a tratar do máis variado, como administración de sistemas
Linux, instalación, configuración de redes, melloras na seguridade,
xestión de software, instalación e xestión de programas ou (no
caso do curso de ferramentas libres), introdución ao código aberto
e á contorna Gnome, ofimática libre (LibreOffice e Abiworld),
edición gráfica (Gimp), deseño 3D (Blender) ou xestión de correo
electrónico (Thunderbird).
Polo que atinxe aos seminarios, están a ser
artellados en colaboración coa Academia Athenea e virán da man de
José Barrán, propietario do devandito Grupo e profesor de
informática con ampla experiencia no eido da programación aberta.
Os seminarios (que en realidade é un, aínda que achegado en dúas
cidades, Santiago e Coruña) van dirixidos a todas aquelas persoas
que estean pensando en montar o seu propio negocio e teñan
orzamentos axustados e confianza no amplo potencial do software libre
en materia de xestión ou de ferramenta de comunicación. Terán unha
duración aproximada de 120 minutos e, ao seu abeiro, trataranse
diversos temas, explicando aos asistentes, en primeiro lugar, temas
de interese xeral á hora de poñer en marcha un novo negocio, como
poden ser, posibles formas xurídicas, trámites burocráticos
necesarios, como obter financiamento ou simplemente por onde empezar;
e en segundo lugar centrándose xa no eido do software libre,
exporanse diversas opcións de negocio que nos brinda o software
libre, como empezar un proxecto de software libre, como facer que dea
beneficio, expoñendo diversos casos de éxito como exemplo.