AGASOL presenta unha páxina para facilitarlles ás ONG as vantaxes do software libre
luns, 10 de outubro do 2011
A Asociación Galega de Empresas de Software
Libre, AGASOL, organizou a semana pasada
un encontro dirixido a achegarlles ás organizacións sen arela de lucro que fan
o seu labor dende a nosa terra as múltiples vantaxes do software libre para a súa
xestión e para a súa comunicación con afiliados e a sociedade en xeral. Pois
ben, a xornada, da que falamos
polo miúdo previamente ao seu desenvolvemento final, serviu entre outras
moitas cousas para dar acubillo á presentación de social.agasol.org,
un portal centrado especificamente no terceiro sector e nos moitos partidos que
lle pode tirar á programación aberta.
Dende Mancomun.org, reflectindo fontes de
AGASOL, describen esta nova achega en liña, tan salientábel para facilitar o
traballo das nosas ONG, como un “espazo
de construción cooperativa de coñecementos para o uso e implantación do
software libre, afacéndose ás necesidades e aos obxectivos das entidades do
terceiro sector”.
O portal, que xorde coa arela de materializarse como unha
ferramenta útil de traballo para tódalas entidades que desenvolven tarefas polo
ben social dos demais, ten os seguintes obxectivos:
· Amosar experiencias e solucións baseadas no
software libre para o terceiro sector.
· Converterse nunha plataforma de intercambio
e colaboración entre axentes TIC e sociais.
· Amosar novas, tendencias e ligazóns de
interese para o sector.
O portal, asemade, apóiase nuns alicerces ben
sólidos: a potencialmente boa conexión entre as empresas e asociacións que
desenvolven programas abertos e as organizacións que traballan de xeito
desinteresado polo ben común, especialmente o das persoas en meirande situación
de exclusión social, laboral ou económica. Dito doutro xeito: nada máis natural
e lóxico que unha ferramenta libre, accesíbel dende tódolos puntos de vista
(mesmo o económico) para apoiar o traballo dunha ONG. Segundo nos lembran dende
AGASOL e Mancomun.org, o software libre “respecta
as liberdades dos usuarios, posibilitando unha relación ética coa tecnoloxía,
motor de transformación social”.
O proxecto en liña da asociación galega de
empresas de software libre está cofinanciado pola Xunta e o Fondo Europeo de Desenvolvemento
Rexional.