A retransmisión dos Xogos Olímpicos en diferido leva aos norteamericanos a seguir as probas pola Internet

Acendido do facho olímpico durante a cerimonia de inauguración dos Xogos de Pequín

Os Xogos Olímpicos de Pequín estanse a converter no fenómeno mediático do verán, e nesta ocasión están a pór a proba distintas tecnoloxías e solucións de comunicación, así coma servir para medir o peso da televisión e da web no seguimento deste tipo de eventos.
Resulta especialmente destacable o feito de que nos EE.UU. decidiron emitir en diferido as probas olímpicas, cunha demora de 12 horas, para que coincidan co horario televisivo de máxima audiencia, o que parece que conseguiu o efecto contrario ao perseguido, posto que moitos espectadores acudiron á Rede para informarse e poder seguir os Xogos en directo.
Non esquezamos que boa parte da emoción das retransmisións deportivas está no descoñecemento dos resultados, polo que a emisión en diferido das probas lles resta moito atractivo, confirmándose agora que a fórmula adoptada para as retransmisións norteamericanas non parece a máis axeitada.
Tamén foi moi importante a aposta da NBC pola retransmisión a través da Internet, aínda que a web NBCOlympics.com estea restrinxida xeograficamente, o que podería ser unha das causas polas que non estean a acadar o tráfico previsto para o servizo do que agardan uns beneficios de 1.000 millóns de dólares, no que consideran que é unha das retransmisións máis ambiciosas que se desenvolveron ata o momento, cos 2.200 horas de vídeo ofrecidas a través da web.