A realidade sonora de Friol será envorcada na Rede polo CCG en colaboración coa veciñanza
xoves, 17 de febreiro do 2022
O
Arquivo Sonoro de Galicia (ASG), centro do Consello da Cultura Galega
(CCG), realiza este venres 18 de febreiro unha nova actividade
encamiñada a enriquecer o Mapa
Sonoro de Galicia proxecto web que ofrece unha perspectiva
xeográfica ás coleccións sonoras custodiadas pola dita
institución: coleccións antropolóxicas, etnográficas,
lingüísticas ou medio ambientais, entre outras. A
actividade deste venres porá o foco no concello de Friol (Lugo),
documentado a realidade acústica do concello dende todos as
devanditas vertentes.
O
director do Arquivo Sonoro de Galicia, Xosé Ramón Pousa, será o
encargado de ofrecer a sesión teórica desta actividade que expón a
importancia do son como valor cultural e a necesidade de conservar os
sons do presente para xeracións futuras, así como o labor que leva
a cabo o ASG, especialmente a través do Mapa Sonoro de Galicia.
A
cita desenvolverase no centro sociocultural da localidade, onde as
persoas asistentes determinarán as voces e os sons (naturais ou
artificiais) que consideran “máis representativos da vila que se
visita e a súa área de influencia”. No acto explicaranse a
dinámica e a técnica de realización das gravacións, que, na súa
maior parte, serán efectuadas cos teléfonos móbiles das persoas
participantes, as cales terán unha semana de prazo para proceder á
súa realización e á subida dos sons ao Mapa Sonoro de Galicia,
onde quedarán, en aberto, a disposición do público.
Esta
xornada é a segunda cita dun ciclo organizado polo ASG que pretende
ir rexistrando as paisaxes sonoras das vilas galegas ao tempo que
incorpora eses sons ao mapa Sonoro de Galicia.