A galega Minotec achega acceso rural de entre 3 e 10 Mb por 29,90 euros
venres, 3 de xuño do 2011
Minotec,
empresa con sede en Baiona especializada no equipamento e posta en marcha de
redes WiMAX para achegar accesos á Rede a onde non chegan as grandes firmas do
sector, vén de pór en marcha un novo paquete de servizos para, en palabras da
propia compañía galega, “rachar de xeito
definitivo coa fenda dixital existente en Galiza”, por outra banda un
problema que arrastramos dende hai anos e que ten múltiples culpables,
comezando polas propias operadoras e continuando coas administracións
responsables. A oferta de Minotec é a todas luces salientábel: o seu novo
servizo ofrece acceso vía satélite con velocidades comprendidas entre os 3 e o
10 Mb e con prezos mensuais que parten dos 29,90 euros. “Deste xeito”, engaden os responsables da firma de Baiona, “en calquera lugar de Galiza, a partires de
agora mesmo, xa é posíbel dispor de acceso a banda larga a altas velocidades e
a prezos máis que axustados”.
Con este innovador e vantaxoso paquete,
informa a empresa, Minotec culmina unha das súas grandes metas: facilitar
cobertura no cen por cen do noso territorio e poder, así, dar solución de
conexión aos datos a calquera fogar ou empresa que o precise. “E todo sen necesidade de apoio de ningún
tipo da administración pública, só a través da busca de solucións para o rural
galego por parte dunha pequena empresa de aquí”, engaden.
O servizo presentado estes días únese ao
sistema posto en marcha dende o seo da firma de Baiona hai uns tres meses e que
consistiu en achegar acceso á Rede ás comunidades de veciños de Navia,
ofertando conexión de 10Mb por 9,90 euros sen cambios no custo, unhas condicións
que probablemente sitúen á oferta entre as máis económicas das achegadas no
noso país dentro do seu ámbito.
Minotec, empresa nova integrada por profesionais das redes (VoIP, Wi-Fi,
WiMAX, datos, vídeo vixilancia, Vía Satélite, Bluetooth, etc), foi posta en
marcha en 2007 con capital cen por cen galego. Dentro das súas áreas de
traballo atópase o despregue de redes WiMAX en contornos rurais, sendo neste
eido todo un referente tanto a nivel galego como estatal, chegando incluso a
facer traballos en lugares como a Cidade Autónoma de Melilla ou a comunidade
autónoma de Castela e León.