A galega Austen amosa en Valencia as súas tecnoloxías 2.0 para combater pragas e optimizar explotacións agrarias
xoves, 3 de outubro do 2013
O Grupo
Austen, iniciativa empresarial con base de operacións en Narón,
está a presentar estes días unha serie de innovadoras tecnoloxías
no marco do Vegetal World
Congress, o Salón Profesional da Innovación e a Produción
Agraria de Valencia. Máis polo miúdo, o grupo galego amosa na dita
feira as súas estacións agroclimáticas Siega
System (en galego Sega), especialmente deseñadas para previr
pragas en cultivos e para facilitar o control de rego de terras a
distancia. Trátase, en palabras dos responsábeis de Austen, “dunha
aposta tecnolóxica pola agricultura 2.0 que se está dando a coñecer
a representantes de empresas e profesionais, comunidade científica,
administración e a grandes e pequenos produtores”. Este son,
precisamente, os colectivo profesionais que adoita xuntar a feira de
Valencia, do 2 ao 4 de outubro.
Sega System, engade a
empresa ferrolá, baséase nunha rede de sensores que, conxuntamente
cunha aplicación informática, monitoriza as variábeis do terreo e
do ar de tal xeito que, vía Internet, fornece ao agricultor
información de valor en tempo real sobre múltiples parámetros. Por
exemplo, as condicións de temperatura e humidade do chan e o
cultivo. Tamén advirte de condicións ambientais de risco e xera
alertas, de maneira que o agricultor recibe no seu móbil ou
computador estes avisos que logo vanlle permitir tomar as decisións
máis axeitadas para mellorar e optimizar a súa explotación,
aforrando custos e traballando na eficiencia. Por outra banda, as
estacións de Austen non precisan instalación nin montaxe, son
móbiles e lixeiras a tiran enerxía de placas solares.
“Sega System”,
engaden os seus desenvolvedores, “mide cantos parámetros desexe o
usuario, e todos eles posibilitan melloras prácticas, por exemplo
medindo a tensión hídrica do chan pódese adecuar o aporte de auga
ás necesidades do terreo e rebaixar o recibo da mesma; e controlando
a temperatura estaremos en condicións axustar os sistemas de
calefacción ou ventilación dos invernadoiros ás necesidades da
planta e aforrando na factura eléctrica; as posibilidades son
infinitas”.
En Valencia, responsábeis
do Departamento de I+D+i de Grupo Austen amosan as vantaxes dos ditos
sistemas nos campos de vide, ensinando aos asistentes o modelo que
empregan para establecer as estratexias de loita anti-fungos
(mildiu), nas súas palabras “unha das peores doenzas do
viñedo se as condicións meteorolóxicas lle son farovábeis”, ou
na loita contra a botrite, outra afección no eido da viticultura.