A escritora, profesora e divulgadora Marilar Aleixandre fala este martes na UDC de como interesar ao alumnado na ciencia
martes, 18 de decembro do 2012
A
Semana da Ciencia, tal e como advertimos, non remata nos días
oficialmente programados (unha listaxe de xornadas orixinariamente
inseridas no mes de novembro e dun tempo a esta parte aplicábel a
todo o mes, e máis alá). Este martes 18 de decembro, a Facultade de
Ciencias acolle
unha actividade que resume e sintetiza en boa maneira o espírito da
dita celebración internacional: o espírito de alentar vocacións
científicas, de amosar as súas vantaxes e beneficios (tanto dende
fóra como, sobre todo, dende dentro) e de quitarlle ferro ao asunto
entre as novas xeracións. A actividade, programada para as 20 horas,
vén da man da profesora Marilar
Aleixandre,
e
desenvólvese baixo o epígrafe Interesar
ao alumnado nas Ciencias: unha tarefa posible?.
Lembrar
que María
Pilar Jiménez Aleixandre é doutora en Bioloxía, cunha tese sobre a
aprendizaxe da selección natural que recibiu os premios de
investigación do Ministerio de Educación e
Ciencia e da Xunta de Galicia. Profesora de Bioloxía en Secundaria
durante 12 anos, arestora
é
catedrática de Didáctica das Ciencias na Universidade de Santiago
de Compostela. É
autora ou coautora de uns cincuenta libros ou capítulos e setenta
artigos sobre a aprendizaxe das ciencias en galego, castelán e
inglés, entre eles os primeiros itinerarios naturais e os primeiros
libros de texto de ciencias en galego.
Baixo
o nome de Marilar Aleixandre, ten publicadas numerosas obras de
poesía, narrativa e narrativa xuvenil e infantil.
Con
respecto á súa conferencia, sinala a UDC, referirase ao descenso na
proporción de alumnado que escolle carreiras científicas, “o que
constitúe unha preocupación en toda Europa, lembrando que distintos
estudos amosan como o alumnado vai perdendo interese nas ciencias a
medida que avanza a escolarización”, engade a Universidade da
Coruña. Con todo, a profesora analizará o feito de que hai
alternativas para un ensino das ciencias máis próximo aos intereses
do alumnado, temas e actividades que poñan de manifesto a relevancia
das ciencias para as nosas vidas. “Non é unha tarefa doada, xa
que nos medios de comunicación préstase máis espazo á
pseudociencia (astroloxía, horóscopo, homeopatía etc) que á
ciencia, e os termos científicos cárganse de significados
negativos, como a frase isto non ten química”, lembra Marilar
Aleixandre.