A comunidade de software libre fará fronte común coa coincidencia numérica do día 11
mércores, 2 de novembro do 2011
Este ano 2011 dase unha confluencia de números,
o vindeiro día 11, desas que ocorren unha vez na vida, ou nin sequera. Para
entendérmonos, o 11 de novembro será o 11 do mes 11 do ano 11, coincidencia que
xa hai quen quere pór de manifesto para celebrar cuestións propias das cifras ou,
tendo en conta esta curiosa circunstancia, que parece un extracto
particularmente interesante da linguaxe binaria, do eido informático. Segundo nos
conta a asociación galega AGNIX reflectindo informacións de CENATIC,
estáselle a dar forma na Rede a unha celebración para conmemorar esta curiosa
data ou, mellor dito, para festexar (coa escusa numérica) o comezo do século do
software libre.
E explican: “Aínda que sexa unha celebración simbólica, non podemos perder a
oportunidade de compartir este encontro sen dúbida único e que servirá para
potenciar e buscar puntos comúns entre as comunidades para o impulso e
desenvolvo iniciativas, difundir avances e sumar esforzos ao redor do Software
Libre”.
Detrás desta convocatoria, segundo nos contan
dende Somoslibres.org,
hai persoas e organizacións de moi distintos países, sendo o seu desexo
celebrar a cultura dos programas abertos como unha forma actual e viva de
cultura solidaria e máis de pensamento liberador e comprometido coa defensa das
liberdades na tecnoloxía. Para a devandita xornada, polo tanto, está xa
programado que se reúnan persoas de distintas comunidades en diferentes partes
do mundo para celebrar o dito festexo, unha xornada para recordarnos (tamén)
que aínda quedan moitas persoas e administracións ás que informar das vantaxes
dos programas abertos, tanto dende o punto de vista do aforro e da sustentabilidade
como da eficacia e da accesibilidade. “Xa
moitos colectivos están a sumarse a este 11-11-11”, engade CENATIC, “e
esperamos que moitos máis acompañen esta celebración de forma libre e creativa
nas redes sociais, canles IRC, listas, radios e medios alternativos, blogs e
toda forma de comunicación”.
