A Xunta volverá a convocar o concurso de licenzas para emisoras de radio
venres, 18 de maio do 2012
- O Consello da Xunta de hoxe tomou a decisión de anular o actual concurso de licenzas de emisoras de radio FM
O Consello
da Xunta celebrado hoxe declarou deserto o concurso público para o
outorgamento de licenzas para a prestación do servizo de comunicación
radiofónica de carácter comercial de ondas métricas con modulación de
frecuencia (radio FM) na nosa comunidade autonómica para evitar unha posible
inseguridade xurídica, fundamentándose nunha serie de incompatibilidades entre
as bases do mencionado concurso e o decreto de
comunicación audiovisual radiofónica aprobado en marzo como adaptación ao
regulamento estatal establecido na Lei de Comunicación Audiovisual do 31 de
marzo de 2010.
Para esta decisión tomouse en conta o criterio do ditame emitido no seu día
polo Consello Consultivo de Galicia sobre o mencionado decreto, que consideraba
que a denominación “emisoras de carácter
comercial” non é correcta, dado que impedía concorrer a aquelas entidades
que non tivesen ese carácter; detectándose tamén incompatibilidades entre o
réxime xurídico de desistencia previsto no decreto e o réxime xurídico de
caducidade establecido nas bases do concurso. O concurso tamén limitaba a
prestación de servizos á tecnoloxía analóxica, mentres que o decreto abre a
posibilidade a calquera tipo de tecnoloxía.
Para salvagardar o interese público e protexer a seguridade xurídica o
Executivo autonómico decidiu declarar o concurso en tramitación como deserto,
de xeito que antes de 6 meses convocará un novo concurso.