A UDC e ABANCA reforzarán o papel referente da Cidade das TIC en Intelixencia Artificial
venres, 28 de xaneiro do 2022
A
Cidade das TIC, o proxecto co-impulsado pola Universidade da Coruña
para crear na antiga Fábrica de Armas da cidade un referencial
centro de coñecemento e emprendemento tecnolóxico-dixital, comezou
o ano cun relevante apoio: o da entidade financeira ABANCA, que vai
traballar conxuntamente coa UDC para incorporar no seu seo recursos
avanzados de Intelixencia Artificial e Big Data (análise de
datos a gran escala). Así
o fixeron saber este venres 28, na sinatura do protocolo entre as
entidades celebrada na Reitoría, o reitor da UDC, Julio Abalde, e
conselleiro delegado de ABANCA, Francisco Botas.
Para
o reitor, este convenio consolida a colaboración entre a UDC e
ABANCA a través do Centro de Investigación TIC (o CITIC) que, é,
segundo lembrou, “o maior centro de IA e o primeiro centro singular
de Tecnoloxías da Información e a Comunicación de Galicia”.
Tamén dixo que “este protocolo reforza a colaboración de ambas
institucións no desenvolvemento da Cidade das TIC como axente de
innovación tecnolóxica clave para a necesaria transformación
dixital do sector empresarial e da sociedade en xeral”, afirmou
Abalde.
Pola
súa banda, Francisco Botas manifestou que “ABANCA é unha entidade
que apostou dende o seu nacemento pola tecnoloxía e a innovación, e
este compromiso lévanos a sumar os nosos esforzos aos de outras
organización públicas e privadas, como a Universidade da Coruña”.
Na súa opinión, este acordo servirá para desenvolver un proxecto
de gran calado para a cidade herculina e para Galicia, e converterase
nun referente no ámbito da tecnoloxía e a innovación dixital.
Convenios
posteriores recollerán as accións concretas para materializar este
protocolo de colaboración que permitirá o intercambio e a formación
de profesionais, profesores e investigadores, así como favorecer a
participación conxunta en proxectos de investigación e
desenvolvemento, entre outras iniciativas. Este protocolo ten unha
vixencia de catro anos, prorrogábel a outros catro.