A UDC acolle a vindeira semana uns encontros técnicos sobre software libre

A Oficina de Software Libre da Universidade da Coruña (UDC) organiza a vindeira semana, a partir do luns 21 e en horario de tarde, a partir das 16.30 horas, uns encontros destinados a pór de manifesto o miolo da programación aberta, centrándose non tanto nas súas vantaxes de cara á sociedade como en todo o relativo aos alicerces mesmos dos principais códigos e programas con vistas ao seu aproveitamento en iniciativas de todo tipo: formativas, empresariais, sociais, etc. Estas Xornadas Técnicas de Software Libre van dirixidas sobre todo ao alumnado da Facultade de Informática das titulacións ás que dá acubillo, así como a outras carreiras técnicas.
Xa nun plano máis específico e segundo informa, punto por punto, a propia oficina, o obxectivo das xornadas é formar aos asistentes nunha serie de ferramentas libres moi presentes na actualidade, “ofrecendo formación especializada de cada unha delas ao mesmo tempo que difundir o coñecemento e o uso do software libre”. As ferramentas coas cales se traballará nestas xornadas serán Python, Django, Android, GStreamer, LXC, Erlang, Haskell, Asterisk e LaTeX.
As xornadas terán lugar na Aula Libre da Universidade da Coruña, emprazada no Edificio Servizos Centrais de Investigación Andar terceiro Campus de Elviña. Podemos completar o programa ao completo nun pdf habilitado pola propia Oficina.