A Tecnópole celebrará a X edición do seu campamento tecnolóxico de verán

O Parque Tecnolóxico de Galicia (Tecnópole) promove, un ano máis, o campamento tecnolóxico de verán T2W -Tecnópole Technological Workshops-, en colaboración coa Consellería de Economía, Empresa e Innovación da Xunta de Galicia. Desta volta chegará á súa X edición.
Esta iniciativa diríxese a un total de 36 rapaces e rapazas de entre 12 e 16 anos e forma parte da aposta da Tecnópole pola divulgación científica de calidade entre os máis novos. As quendas serán do 4 ao 8 de xullo e do 11 ao 15 de xullo, en horario de 10:00 a 18:00 horas. O prazo límite de inscrición será o 3 de xuño ou ata que se cubran as prazas dispoñíbeis.
Debido ao éxito do módulo Voamos con números: unha aventura aérea, dende a Tecnópole consideraron celebrar este campamento tecnolóxico aproveitando a metodoloxía e os recursos empregados nese módulo. O campamento oferta un conxunto de actividades didácticas e amenas que permitirán aos participantes introducirse nos conceptos básicos da aviónica e a electrónica. Tamén aprenderán a pilotar empregando simuladores de voo profesionais, crearán plans de voo, iniciaranse na montaxe e manexo de drons, na programación de placas electrónicas, etc.
O custo do campamento é de 150 euros, e inclúe acceso a todas as actividades e materiais, transporte dende varios puntos de Ourense, a comida e entrada diaria á piscina do Parque. A metodoloxía deste campamento é innovadora e práctica, buscando que a experiencia sexa enriquecedora e divertida ao mesmo tempo.