A Technium LAN Party de Ourense, a piques de comezar
mércores, 10 de abril do 2013
- Alumnado da Escola Superior de Enxeñaría Informática organiza unha nova “quedada” do 12 ao 14 de abril no Pavillón do campus
Os seareiros das novas
tecnoloxías teñen unha cita este venres 12 de abril á que non
poden faltar, a Technium LAN Party
2013, un encontro informatizado que
se celebrará no pavillón do campus de Ourense e que se
prolongará dende o venres ás 8 da mañá até o domingo ás 20
horas. Os asistentes á Technium LAN Party terán 55 horas
ininterrompidas para conectarse e partillar coñecementos e dúbidas
cunha conexión de 100 Mbps simétricos e unha LAN completamente a
Xigabit, os inscritos poderán levar o equipo informático que
desexen (videoconsolas e ordenadores). Durante os días de
celebración terán sitios habilitados para descansar (recoméndase
levar saco de durmir) e duchas á súa disposición. O prezo para as
persoas que queiran achegarse será de dez euros para toda a fin de
semana e de tres euros para un só día.
Esta
xuntanza -segundo apunta a Universidade de Vigo- nace da
reformulación da quedada informática
que se viña realizando nos últimos anos no campus baixo o nome de
Scul Party.
Con ánimo de continuar a organización deste evento en 2013, a ASEII
(Alumnado da Escola Superior de Enxeñaría Informática) en
colaboración co centro, decidiu asumir a súa organización
apostando por abrir a participación a todas as persoas de fóra de
Ourense, ampliando os seus contidos con conferencias e incrementando
os servizos a disposición dos inscritos. A Technium
LAN Party deste ano constará de tres
apartados principais. Haberá concursos como o lanzamento de CD, de
fotografía, de programación, de Minecraft, de Overclock e de diseño
2D. Tamén se celebrarán torneos de Magic:
The Gathering; de Team
Fortress 2; de League
of Legends, de TrackManía
United; de Poker;
de Counter Strike: Global Offensive
e de Age of Empires 2,
entre outros. Como novidade está a celebración de varias
conferencias, entre elas a de Nuno Troitiño -titulada Hackeando
o Sistema Operativo Humanos- sobre o
compoñente humano nas novas tecnoloxías, e unha introdución á
programación con Android, na que os participantes verán de xeito
práctico como crear aplicacións para este sistema coa linguaxe de
programación Java.