Presentadas novas propostas galegas de pulo á programación aberta con motivo da Libre Software World Conference
martes, 2 de outubro do 2012
Os vindeiros días, Santiago estará por dereito
propio no punto de mira da comunidade internacional de usuarios e
desenvolvedores de programas abertos. Ou sexa, de todos aqueles que defenden
para a informática os preceptos da cultura libre (que ollo, non ten porqué
significar cen por cen de balde, que cada achega é un mundo). Falamos da Libre Software
World Conference 2012, un evento que
xa anunciamos en Código Cero e que se vai desenvolver os días 18 e 19 de
outubro, dando acubillo a boa parte dos principais expertos internacionais na
materia. Como novidade a destacar, dicir que co gallo do encontro, o Espazo Ecosocialista Galego está a presentar
as súas propostas para darlle pulo ás tecnoloxías libres.
Estas propostas veñen achegadas en estreita
relación con cuestións como o fomento empresarial, o emprego destas ferramentas
libres na administración pública e no ensino ou a súa aplicación no ámbito
científico e investigador (a través de licenzas copyleft). O obxectivo principal do
Espazo Ecosocialista con este documento-manifesto é “axudar a reducir
e eliminar a fenda dixital entre sectores sociais e hábitats, promovendo o
desenvolvemento global do emprego das novas tecnoloxías”. Para os ecosocialistas,
a realidade amosa que se ben se incrementa o uso destas ferramentas tecnolóxicas
(TIC) nos núcleos e espazos máis desenvolvidos, pola contra as sociedades desfavorecidas
asisten ao afianzamento da exclusión dixital que, por outra banda, non fai máis
que aumentar os seus problemas de progreso e modernización. Resultado? Máis diferenzas
sociais, económicas, xeracionais, profesionais e formativas.
Para a agrupación, a solución ao problema
comeza por apostar dende as administracións públicas, de xeito unánime e
integral, polo software e polo hardware libre. Nun plano concreto, pasaría “por apoiar ás plataformas que garantan unha
industria localizada de software e hardware libre, a través da
incorporación de empresas".
Tamén defenden a posta en marcha de “mecanismos efectivos para incrementar
e axilizar o uso no ámbito empresarial, con especial apoio aos autónomos
e pequena e mediana empresa a través de axudas para a formación,
instalación, migración, mantemento...”. Proponse tamén o apoio ás
empresas (PEME) produtoras de software e hardware libre, así como ás
vinculadas que completan a actividade (formación,
asesoramento, instalación, migración, mantemento...).