A FIC elixe un sistema de citas radiolóxicas como gañador do seu concurso de TFG
venres, 18 de decembro do 2015
A
Facultade de Informática da Universidade
da Coruña (FIC) vén
de elixir gañadores do seu concurso de Mellor Traballo Fin de Grao
Aplicado (TFG). No certame
do mellor TFG
aplicado da FIC participaron as empresas Everis,
Indra, Telecon, o Instituto Tecnolóxico de Galicia e o Grupo Voz.
Asemade, cómpre sinalar a colaboración do CITIC e da Fundación
Universidade da Coruña. E indo aos premiados, dicir que foron tres
os galardoados, facéndose co primeiro posto unha ferramenta
para a xestión de citas radiolóxicas,
especialmente útil para as clínicas de mediano e pequeno tamaño
que adoitan carecer de programas informáticos para este tipo de
casos, o responsábel do enxeño é Martín Lamas Díaz, que logrou
un premio de 1.500 euros.
Emporiso, o xurado quixo
recoñecer o traballo de dous alumnos máis: Fernando Posse Álvarez
(que recibiu unha recompensa ao seu labor de 500 euros) quen creou
unha
aplicación para desenvolver software de xeito moi rápido e fiábel.
Estamos perante un dispositivo de recomendación para o
autocompletado intelixente de código. A mesma cantidade (500 euros)
recibiu Manuel Suárez Abella por un sistema
domótico controlado pola Wi-Fi da casa, o que
permite a independencia da rede fornecida polas empresas instaladoras
e reduce os custos.
Engadir que todos os traballos
presentados ao concurso, tanto os tres premiados como os outros tres
que ficaron finalistas, tiñan en común a finalidade de solucionar
problemas reais do mercado.