A Deputación da Coruña e o Concello de Ferrol queren abrir un centro de co-working TIC
martes, 12 de xullo do 2016
A Deputación
da Coruña e o Concello de Ferrol anunciaron esta semana a súa
intención de pór en marcha un novo centro de co-working no
centro comercial Porta Nova da cidade departamental. Este centro
de innovación, inserido no marco do Plan de Emprego da Deputación
(de alcance provincial), tería como eixe de actividade principal o
deseño e desenvolvemento de ferramentas, servizos e tecnoloxías da
información e a comunicación. A iniciativa, proposta polo Concello
ao organismo provincial, viría a revitalizar un complexo comercial
arestora en desuso, o de Porta Nova, para poñelo ao servizo dos
emprendedores da comarca.
Así o anunciou o
presidente da institución provincial, Valentín González Formoso,
ao remate da reunión de traballo que mantivo no seu despacho co
alcalde de Ferrol, Jorge Suárez, e as concelleiras de Urbanismo e de
Patrimonio da cidade naval, María Fernández Lemos e Rosa Méndez.
O espazo de traballo
colaborativo e innovadora ocuparía o andar superior do dito centro
comercial. O obxectivo concreto, subliñaron, “é favorecer que se
asenten alí iniciativas emprendedoras vinculadas á innovación e ás
novas tecnoloxías”. Isto, ao xuízo alcalde, suporía “unha
aposta de diversificación fronte ao monocultivo do naval nunha
cidade”, subliñou, que amosa un claro “deterioro socioeconómico
grave debido ao incremento do desemprego e a perda de poboación”.
Jorge Suárez tamén fixo saber a intención de buscar tamén o apoio
doutras entidades para este proxecto, como a Cámara de Comercio.
González Formoso
sostivo que estudará con interese o proxecto, que "podería
encaixar" dentro das accións do Plan de emprego local (PEL)
2016-2019, impulsado polo actual Goberno provincial co obxectivo de
favorecer a creación de emprego nos sectores público e privado.
Entre outras acciónsd, o PEL abrangue iniciativas de apoio á
creación de novas iniciativas empresariais, fomento de viveiros e
incubadoras de empresas e posta en marcha de novos espazos de
co-working que fomenten as sinerxias empresariais na
provincia.
O proxecto presentado
polo alcalde de Ferrol inclúe a dotación de 10 locais de traballo
colaborativo, 4 aulas modulares subdivisibles e un local multiusos,
ademais dun espazo de recepción-información e salas de reunión,
nos 1.485 metros cadrados cos que conta a parte alta do inmóbel.