Retro Games trae o ZX Spectrum de volta

Nos últimos días puidemos ver como un par de tendas filtraban os datos de The Spectrum ao abrir as reservas desta nova creación de Retro Games, compañía que vén de anunciar oficialmente a recreación do ZX Spectrum de 1982, que chegará ás tendas o 22 de novembro a un prezo de 99,99 euros, destacando polo feito de que a cadea de tendas GAME vaia ter unha edición especial con ilustracións de Alfonso Azpiri na súa caixa.
Hoxe Retro Games e a distribuidora Plaion estrean o tráiler desta réplica do Spectrum con teclas de goma, ao que dotaron de saída de vídeo de alta definición a través de HDMI e 4 portos USB para poder conectar mandos externos e cargar xogos e aplicacións que vaian máis aló dos 48 que veñen preinstalados, entre os que destacan grandes títulos como Manic Miner, The Hobbit, Target: Renegade, Match Day II, Saboteur, The Great Escape, Head Over Heels, Alien Girl, Phantis e Army Moves.
Este interesante produto para nostálxicos busca rememorar a experiencia de empregar un ZX Spectrum, simulando incluso a estética de pantallas CRT mediante filtros, pero evitando limitacións como os tempos de carga das cintas e incluso a dificultade dos xogos, xa que The Spectrum conta con 4 espazos de gravación de partida para cada xogo, e incluso permite rebobinar até 40 segundos durante as partidas, o que resulta de grande utilidade para superar os xogos máis desafiantes.
Dende Retro Games lembran que non só se limitan a permitir a carga de xogos, senón que The Spectrum tamén incorpora a posibilidade de programar en BASIC como acontecía co ordenador orixinal de Sinclar.
Queda agora por ver se este novo produto conseguirá un éxito semellante ao das consolas mini que se venderon en anos anteriores, pois estamos ante a réplica dun ordenador, non dunha consola (aínda que se centrase tamén nos videoxogos), polo que a experiencia de xogo non está ligada a un mando característico co que poder transmitir unha sensación diferente a que podemos ter agora empregando un emulador directamente nun ordenador persoal. O que si consegue The Spectrum é plasmar un deseño icónico, polo que non faltará quen adquira esta produto simplemente como elemento decorativo co que rememorar unha infancia ou mocidade.