Prime Gaming reforza o seu catálogo de xogos do mes de setembro

A semana pasada anunciaban que os subscritores de Amazon Prime ían contar con varios xogos de O Señor dos Aneis dispoñibles a través do servizo Prime Gaming para celebrar a estrea da segunda tempada de Os Aneis de Poder, e non conformes con esa grande oferta de xogos, anuncian a ampliación dos títulos que estarán dispoñibles en setembro.
A principal sorpresa desta actualización de xogos é que inclúe outro xogo de O Señor dos Aneis, concretamente LEGO The Hobbit, que poderán conseguir os usuarios a través de GOG a partir do 19 de setembro.
Este mes tamén se ofrecen varios títulos da franquía Borderlands, como son Borderlands 2, Borderlands: The Pre-Sequel e Tales from de Borderlands, todos a través da tenda de Epic Games, aínda que no caso do último xogo citado haberá que agardar até o día 12 para poder incorporalo á nosa colección.
Outros xogos interesantes que chegarán en setembro son a edición definitiva de Shadow of the Tomb Raider (xa dispoñible para engadir na colección da tenda de Epic Games) e LEGO Indiana Jones: The Original Adventures (dispoñible a través da aplicación de Amazon Games), aos que se suman moitos outros títulos até superar un total de 20.