O OnePlus 10T 5G aposta polo rendemento e a carga rápida

mércores, 3 de agosto do 2022 Marcus Fernández

O OnePlus 10T xa é oficial, no que supón un importante salto en rendemento e carga rápida, pero prescindindo dun par de sinais de identidade dos anteriores móbiles insignia da marcha: a cámara Hasselblad e o Alert Slider (interruptor que facilita pór o móbil en silencio, característico de OnePlus durante anos).
O novo smartphone funciona cun procesador Qualcomm Snapdragon 8+ Gen 1, 8/16 GB de RAM LPDDR5, 128/256 GB de almacenamento UFS 3.1, pantalla AMOLED Full HD+ de 6,7 polgadas cunha velocidade de refresco de 120 Hz, cámara traseira tripla cun sensor principal de 50 Mpíxeles e estabilización óptica de imaxe, cámara frontal de 16 Mpíxeles, NFC, Bluetooth 5.2, altofalantes estéreo e batería de 4.800 mAh con carga rápida SUPERVOOC de 150 watts, ou sexa, que sería capaz de cargar a batería até o 67% da súa capacidade en só 10 minutos.
O modelo con 8 GB de RAM e 128 GB de almacenamento venderase a 719 euros, mentres que o modelo con 16 GB de RAM e 256 GB de almacenamento custará 819 euros, estando previsto que estes terminais comecen a chegar a mans dos compradores o 26 de agosto.

O OnePlus 10T carece de cámaras Hasselblad e Alert Slider, pero pode presumir de grande rendemento e carga rapidísima

PUBLICIDADE