Metal Slug Tactics verá a luz o 5 de novembro

A serie de xogos Metal Slug causou sensación nos salóns recreativos converténdose no run and gun de referencia de Neo-Geo, e aínda que posteriormente se adaptou a consolas, ordenadores e móbiles conservando as súas mecánicas, tamén inspirou entregas con mecánicas diferentes, como a que vai chegar o vindeiro 5 de novembro: Metal Slug Tactics.
Falamos dun xogo de rol táctico que colle a estética de Metal Slug e introdúcea nun contorno de enfrontamentos tácticos con toques de roguelite, cun acompañamento musical tamén inspirado na serie de xogos orixinal.
O xogo, con gráficos pixelados, é un alarde de variedade, con 110 mapas feitos a man, 20 tipos de misións, 36 armas diferentes (con 176 modificacións) e 9 personaxes icónicos de Metal Slug.
Un título que, se ben non coincide en xénero cos Metal Slug clásicos, poderá cativar aos seus seareiros coa súa estética nostálxica nas súas versións para PC (Steam), Nintendo Switch, consolas PlayStation e consolas Xbox.