Fortnite volve á App Store estadounidense

O verán pasado Epic Games estreou tenda de aplicación para móbiles, co que conseguiron que Fortnite volvese ao iPhone en Europa, aínda que sexa con certas molestias para os usuarios, mentres que nos EE.UU. o xogo permanecía ausente en iOS, o que entendían que mudaba coa última resolución xudicial contra Apple.
A cousa non resultou tan doada como se entendía, e Apple puxo atrancos para tal retorno á App Store estadounidense, levando a que Epic recorrese de novo aos tribunais, que fixaron unha vista para o vindeiro venres, o que parece ter acelerado as reaccións de Apple, que finalmente deu o brazo a torcer, e por fin Fortnite está de regreso na App Store de EE.UU., tras preto de 5 anos de ausencia.
O xogo está dispoñible para iPhone e para iPad, e evita que os usuarios teñan que realizar pagamentos a través da App Store (ofrecendo unha alternativa opcional), algo ao que Apple se opoñía firmemente, pero que a Xustiza considerou que era un abuso de posición dominante.
Queda agora agardar para ver como remata esta historia, porque o que non parece razoable é que haxa políticas de publicación tan dispares entre territorios, cando a presión lexislativa está a producirse en varios países precisamente para forzar ás grandes tendas de aplicacións a cesar nos seus abusos de posición dominante.