Endesa presta axuda TIC ás nosas empresas rurais

Endesa pon en marcha un plan para axudar ás pemes do mundo rural, de maneira que estas poidan desenvolver solucións de comercio electrónico e afianzar os seus negocios tras a crise económica e sanitaria marcada pola COVID–19. O acordo foi aprobado hoxe polo director executivo (CEO) de Endesa, José Bogas, e Carmen Quintanilla, presidenta de AFAMMER (Confederación de Federacións e Asociacións de Familias e Mulleres do mundo Rural).
A iniciativa busca axudar ás pemes a adaptarse tecnoloxicamente ás novas formas de comercio. De este xeito, o Plan de Responsabilidade de Endesa inviste na formación e en axudas concretas en territorios como Galicia, Aragón, Madrid, Estremadura, Andalucía, Cataluña, Canarias e Baleares.
O proxecto conta con dúas fases. A primeira consiste en participar nos webinar e nas clases en liña producidas por Endesa e AFAMMER, co fin de deseñar e desenvolver as competencias dixitais. Mentres, a segunda fase da iniciativa, pretende atender directamente a 150 pequenas e medianas empresas para que implanten ou impulsen as súas ferramentas de comercio en liña, ademais de iniciar ou incrementar a súa capacidade comercial ofrecéndolles todo aquilo que necesiten.
José Bogas, destaca que “a capacidade da sociedade para, con axilidade, unir esforzos e envorcar a dirección dos seus proxectos cara a un foco distinto e solidario, debe ser unha desas leccións aprendidas que chegaron para quedar”. Doutra banda, a presidenta nacional de AFAMMER, considera que “o proxecto será beneficioso para o medio rural porque axudará ao desenvolvemento e a creación das pequenas e medianas empresas nesas zonas” e destaca “a experiencia de AFAMMER na xestión de proxectos deste tipo a nivel estatal”.
O orzamento que se destina para a iniciativa é de 615.000 euros. As pemes interesadas poderán solicitar información na web de AFAMMER.