Clair Obscur: Expedition 33 é o meirande lanzamento de terceiros este ano en Game Pass

Clair Obscur: Expedition 33, o celebrado xogo de rol de Sandfall Interactive, acaba de acadar un novo fito ao proclamarse como o maior lanzamento de terceiros en Xbox Game Pass no que vai de 2025, segundo o número de usuarios únicos durante os seus primeiros trinta días de dispoñibilidade. O estudio francés suma así outro éxito nun ano no que xa arrasou nos Golden Joysticks e parte como favorito nos The Game Awards.
O director creativo de Sandfall Interactive, Guillaume Broche, agradeceu o apoio recibido por parte da comunidade: «Este ano foi moito máis alá do que ningún de nós podía imaxinar, e débese a canto de apaixonados e solidarios foron os nosos seguidores para facer iso realidade. É realmente angustioso ser un estudio novo que publica o seu primeiro xogo, pero o apoio de todo o mundo fixo que todo se sentise como un soño».
Pola súa banda, o director de ID@Xbox, Guy Richards, explicou por que o proxecto chamou a atención de Microsoft desde moi cedo: «Desde o comezo, a ambición de Sandfall era evidente e realmente sentimos que querían crear algo verdadeiramente especial, algo máis alá do que se podería esperar do equipo. Cando xogamos ás primeiras versións, experimentamos a súa historia absorbente, os seus impactantes gráficos e esa mestura de mecánicas de xogo de rol xaponés con temas culturais franceses que resultaba fresca e diferenciada. É o tipo de experiencia que sabiamos que aos xogadores de Xbox lles gustaría descubrir».
Broche tamén destacou o papel decisivo de Xbox na promoción do xogo, lembrando que a compañía estivo presente desde o anuncio oficial no verán de 2024 ata a visita ao estudio para a presentación de Developer_Direct a comezos deste ano. Segundo explicou, esta colaboración foi esencial para que Expedition 33 lograse «facer tanto ruído» no mercado.
O creador subliñou ademais o impacto da súa chegada a Xbox Game Pass, que permitiu que moitos xogadores se achegasen ao título sen prexuízos: «Permitindo que moita xente probase o noso xogo cando quizais non o farían doutra maneira. O xénero de xogos de rol por quendas ten moitos seguidores, pero ás veces pode afastar a quen prefire xogos con acción en tempo real; con todo, Game Pass baixou esa barreira de entrada. Podían simplemente probalo e ver que sensación lles transmitía. Así que moitos xogadores curiosos puideron comezar o xogo, explorar Lumière e as primeiras horas, e decatarse de que aquí hai moito que gozar, mesmo se non o esperaban de inicio».
Ambientado nun universo fantástico de aparencia luminosa pero cargado de segredos escuros, Clair Obscur: Expedition 33 relata a misión desesperada da Expedición por salvar a súa cidade da enigmática Paintress, unha entidade divina que destrúe cada ano á xeración máis vella dos habitantes. A súa combinación de narrativa, personalidade visual e reinterpretación do combate clásico converteuno nun dos títulos máis comentados de 2025.
Xbox sinalou que o éxito de Expedition 33 exemplifica o propósito de Game Pass: apoiar experiencias diversas e innovadoras, permitir que estudos de todos os tamaños cheguen ao público global e ofrecer un valor engadido aos usuarios da plataforma.