As novas cámaras de Blackmagic Design facilitarán os directos inmersivos

Blackmagic Design deu a coñecer no marco da feira NAB 2026, celebrada en Las Vegas, a nova Blackmagic URSA Cine Immersive 100G, unha cámara pensada especificamente para producións inmersivas en directo. Trátase do primeiro modelo cinematográfico deste tipo que integra conectividade Ethernet 100G, dous sensores RGBW 8K x 8K e un rango dinámico de 16 pasos.
Blackmagic Design acompañou este lanzamento coa presentación do Blackmagic URSA Live Encoder, un módulo encargado de comprimir as imaxes en ProRes e transmitilas mediante sinais IP baseados no estándar SMPTE 2110-22. Este sistema permite combinar fluxos estereoscópicos de alta frecuencia nunha única conexión de alta capacidade.
Segundo explicou o director executivo da empresa, Grant Petty, «as producións inmersivas en directo xa son unha realidade» e este novo equipamento facilita a súa adopción en ámbitos como o deporte ou os concertos, cunha experiencia visual que sitúa o espectador no centro da acción.
A cámara incorpora dous sensores independentes de resolución 8K x 8K, un para cada ollo, baseados nun deseño RGBW que mellora a captación cromática grazas a un supermostraxe equilibrado de píxeles vermellos, verdes e azuis. Esta configuración permite manter unha alta calidade de imaxe mesmo en condicións esixentes, como as emisións en directo con altas taxas de fotogramas.
O sistema de codificación asociado posibilita a transmisión en directo en formato ProRes a través de Ethernet 100G, mantendo a taxa de datos por debaixo dos 50 Gb/s, o que abre a porta a combinar sinais de dúas cámaras nunha soa conexión.
A nova cámara xa foi empregada en contidos como Spectrum Front Row, unha serie de partidos dos Lakers producidos en formato Apple Immersive durante a tempada 2025-2026 e dispoñibles en plataformas para dispositivos Apple Vision Pro. Ademais, a liña URSA Cine Immersive participou en producións como MotoGP: Tour De Force, Debut at the BBC Proms, un documental sobre o Real Madrid e a cobertura do lanzamento da misión Artemisa II da NASA.
Entre as principais características do modelo destacan o sistema de dobre óptica para gravación en formato inmersivo, a captura tridimensional en resolución 8K por ollo, o soporte para Blackmagic RAW e ProRes, así como a inclusión do módulo de almacenamento Blackmagic Media Module de 8 TB e o software DaVinci Resolve Studio.
A Blackmagic URSA Cine Immersive 100G estará dispoñible a partir do terceiro trimestre do ano cun prezo de 22.825 euros, mentres que o modelo base da gama xa se comercializa por 21.545 euros. Pola súa banda, o dispositivo URSA Live Encoder chegará ao mercado a finais de ano (a un prezo de 1.295 euros).