A expectación polo xogo Grand Theft Auto VI é incontestable, e o lanzamento do seu primeiro tráiler está a ser unha boa mostra disco, xa que só precisou de 22 horas para superar os 85 millóns de reprodución, superando a marca establecida por MrBeast como o vídeo non musical máis reproducido en 24 horas.

Tras o desastroso intento de Nothing de lanzar unha aplicación para permitir que o seu último smartphone puidese intercambiar mensaxes cos iPhone de xeito nativo, a xente de Beeper, que xa contaba cunha solución semellante baseada ordenadores con macOS nos que iniciar sesión na mensaxería de Apple (pero que ao ser de código aberto podía instalarse en ordenadores controlados polos usuarios), sorprende anunciando Beeper Mini, unha aplicación para Android que permite enviar mensaxes aos iPhone que sexan identificados de xeito nativo (nunha burbulla azul).

Para facilitar o acceso á información sobre a actualidade dende o móbil a Televisión de Galicia estrea estes días unha canle de WhatsApp á que os usuarios poden subscribirse para poder consultar unha escolma das novas do momento, a predición meteorolóxica e algún vídeo que dende os servizos informativos da TVG teñan a ben salientar.

Durante estas datas é tradicional a compra de Lotaría de Nadal, e ante as dúbidas sobre como compartir boletos a distancia dende o bufete coruñés Pinto & Salgado advirten dos problemas que supón que unha persoa se encargue de adquirir e gardar un décimo de lotaría e remitir a persoas cos que o comparte unha fotografía do mesmo a través de WhatsApp ou correo electrónico.

Dende hai bastantes anos Microsoft quere axudar ás persoas con eivas visuais tirando proveito da intelixencia artificial dende o móbil, para o que lanzou a aplicación Seeing AI para o iPhone, e que finalmente dá o salto a Android, facilitando que tanto persoas cegas como con baixa visión poidan empregar o seu smartphone como axuda no seu día a día para tarefas como describir o contorno, ler o correo ou escoitar as características de obxectos, fotografías ou persoas.

Vodafone España vén de realizar o primeiro piloto no mercado español para probar as capacidades que ofrecen as frecuencias 5G na banda milimétrica de 26 GHz, acadando velocidades de descarga superiores a 2 Gbps e de subida por enriba de 430 Mbps, respectivamente, na súa rede comercial.

Empregar dispositivos como lentes intelixentes para a formación de profesionais da saúde é un dos elementos máis destacados dun proxecto de innovación interdisciplinario no que participa a USC: unha iniciativa coa que se pretende deseñar, poñer a proba e expandir o uso das novas tecnoloxías para reforzar as competencias asistenciais de profesionais, estudantes e profesorado do ámbito da saúde. “Con dispositivos coma as lentes intelixentes”, explican os impulsores do proxecto, “unha persoa profesional da Enfermaría podería gravar un procedemento de forma que se poida amosar o vídeo nunha aula e debater sobre cal sería o paso seguinte ou analizar se se fixo correctamente”.

O venres 15 de decembro conclúe o prazo de recepción de candidaturas para participar na primeira edición do programa Tech Angels do Clúster TIC Galicia. Trátase, en palabras da agrupación empresarial galega que preside Antonio Rodríguez del Corral, “dunha pioneira iniciativa, posta en marcha a través dun convenio coa AMTEGA e o IGAPE que permitirá a emprendedores e startups de calquera sector produtivo acceder a tecnoloxías complexas, como a Intelixencia Artificial, e ao expertise de socios da entidade, que actuarán, precisamente, como Tech Angels”.

O Museo de Pontevedra puxo na Rede, a disposición da cidadanía, as transcricións dos cadernos de Xosé Filgueira Valverde e Sebastián González García-Paz sobre o patrimonio artístico de 70 parroquias de Agolada, Dozón, Lalín, Rodeiro, Silleda e Vila de Cruces. Entre a documentación do Seminario de Estudos Galegos (SEG) que conserva o Arquivo do Museo de Pontevedra atópanse varios cadernos e notas soltas con apuntamentos recollidos por Xosé Filgueira Valverde e Sebastián González García-Paz durante as xeiras de Deza, as saídas conxuntas pola comarca que fixeron os membros do Seminario entre 1928 e 1935. A transcrición destas anotacións está agora dispoñíbel para a cidadanía nunha sección na web do Museo.

A operadora galega R fixo balance dos seus últimos e relevantes traballos de cobertura despregados no rural galego, marcado, como recordaremos, pola complexa orografía e pola dispersión poboacional. Segundo informou a compañía, a cobertura de banda larga de R na Galicia non urbana xa está presente en 76 novos concellos con tecnoloxía 5G e coa fibra de Rede Aberta en 278 núcleos. Estes avances realizáronse ao abeiro da solución Internet Rural 5G, (a través do mambo Axiña) destinada a cubrir arredor de 300.000 inmóbeis que en Galicia, polas dificultades da orografía das súas contornas, non poden ter acceso á fibra óptica.

Investigadores da Universidade de Vigo realizou a que sería, segundo a institución académica, a meirande análise comparativa da calidade do subtitulado en directo fronte ao subtitulado automático. No seu estudo constatan que a Intelixencia Artificial avanzou un importante treito neste último ano, pero que cómpre traballar para que se garanta a accesibilidade de todos os colectivos no proceso. Este traballo levouse a cabo no marco do proxecto Qualisub, que presentou os seus resultados nun foro organizado pola Comisión Europea.

A Xunta formalizou este luns 4 de decembro a renovación do equipamento da Aula CeMIT do Concello de Ames, foco municipal de formación e dinamización tecnolóxica entre a cidadanía. Participaron o delegado da Goberno galego na Coruña, Gonzalo Trenor, e máis o alcalde, Blas García. Grazas ao apoio da Xunta adquiríronse 15 computadores All In One, 10 tabletas, equipamento complementario e material innovador (2 impresoras 3D, 1 kit de robótica, 5 drons, 2 gafas virtuais e un kit de programación).

Nas últimas semanas había moita expectación de cara á publicación do primeiro tráiler de Grand Theft Auto VI, e incluso o anuncio de que o vídeo fose a publicarse este martes ás tres da tarde tivo moita repercusión, deixando claro que non estamos ante un fenómeno calquera, senón ante a secuela do produto cultural de maior facturación de todos os tempos.

A Deputación de Lugo e o Instituto Nacional de Ciberseguridade (INCIBE), dependente do Ministerio de Transformación Dixital, poñen a disposición da cidadanía diferentes dispositivos para formar e informar sobre as ameazas de Internet. Fano na sede da institución provincial, cunha instalación ao servizo da veciñanza destinada a mellorar os seus recursos para garantir navegacións seguras.

Vodafone España vén de designar ao enxeñeiro de Telecomunicacións pola Universidade de Vigo, Jose Suárez da Puente, como novo director territorial da zona norte, ámbito que inclúe as comunidades autónomas de Galicia, Castela e León, Asturias, País Vasco, Cantabria, Navarra e A Rioxa.

A Área de Cultura e Promoción da Lingua do Concello de Lugo e a Fundación Museo do Videoxogo de Galicia (MUVI) organizan a exposición Literatura e videoxogos. Será no Museo Interactivo da Historia de Lugo (MIHL) durante dous meses: dende o 5 de decembro até o 9 de febreiro. A inauguración está prevista para este 5 de decembro ás 12.00 horas.

O conselleiro de Cultura, Román Rodríguez, presentou este luns 4 de decembro no Gaiás unha nova instalación inmersiva na Cidade da Cultura que combina arte e tecnoloxía. Trátase de Hábitats. Natureza estendida, en palabras do conselleiro “unha aventura sensorial que emprega Realidade Virtual e Aumentada para levar ao público a viaxar polos cinco continentes sen saír do Museo Centro Gaiás”. Román Rodríguez subliñou o carácter accesíbel desta proposta, “concibida para todos os públicos atendendo aos conceptos de sustentabilidade e cultura inclusiva”. De feito, fíxose un esforzo especial por garantir que poidan contemplar a mostra persoas de mobilidade reducida. A maiores, empregáronse nela materiais reciclados e biodegradábeis.

A sede na Coruña da Agrupación Cultural Alexandre Bóveda acolleu unha actividade tecnolóxica abeirada ao ciclo Pensando o futuro: a conferencia Intelixencia Artificial e as novas tecnoloxías lingüísticas: oportunidades para a lingua galega, impartida por Rubén Cela, actual director da Oficina Técnica do Proxecto Nós, proxecto para incrementar a presenza do galego no panorama actual da IA, impulsado pola Consellería de Educación, a Secretaría Xeral de Política Lingüística e a Universidade de Santiago. A sesión foi presentada pola catedrática de Linguaxes e Sistemas Informáticos da Universidade da Coruña (UDC) Nieves Rodríguez Brisaboa.

O delegado do Goberno en Galicia, Pedro Blanco, estivo a semana pasada no concello ourensán de Vilardevós, onde puxo en valor o traballo desenvolvido para evitar o despoboamento e onde analizou o resultado de proxectos apoiados polo Executivo central, como o financiamento con máis de 40.000 euros da renovación da iluminación exterior municipal. Tamén anunciou que o Goberno achegará o servizo de Internet de alta velocidade á práctica totalidade do termo municipal dentro do Programa Único-Banda Larga.

A pasada fin de semana a banda estadounidense KISS despediuse dos escenarios no Madison Square Garden cunha grande sorpresa, que que como peche do concerto do sábado os espectadores puideron ver a canción God Gave Rock And Roll To You interpretada por novos avatares dixitais no que pretenden que sexa unha mostra da nova era da formación que leva máis de 50 anos de carreira, e que despídese do mundo físico para abrir ao mundo dixital.